Nipisat suaasa akissaat pillugit isumaqatigiinniarnerit ingerlalluartut

KNAPK-p Royal Greenlandillu nipisat suaasa akissaat pillugit piffissami sivitsortumi isumaqatigiinngissutigaat, maannali isumaqatigiissusiortoqalerunarpoq.
KNAPK sinnerlugu akerliussutsiminnik takutitsisut. Nipisat suaasa kiilumut akiisa 22 koruuninit qaffasinnerunissaat taakku piumasaraat. Assi © : Malik Brøns / KNR
Allattoq Mads Malik Fuglsang Holm , Mads Lynge
apriilip 17-at 2022 15:11

Nipisat suaasa akissaat pillugit isumaqatigiinniarnerit piffissami sivisuumi uninngariarlutik, KNAPK Royal Greenlandilu apriilip ulluisa qulinganni isumaqatigiinniaqqilerput.

Nipisallu suaasa akii pillugit maanna isumaqatigiissusiortoqalerunarpoq.

AAMMA ATUARUK Nipisaat suaannik aalisartut akerliusut: Akit qaffanngippata aalisarnianngilanga

Nipisat suaasa akissaat pillugit isumaqatigiissut KNAPK-mit Royal Greenlandimiillu arfininngornermi apriilip ulluisa 16-ianni atsioqatigiittut, Aalisarnermut Piniarnermullu naalaakkersuisoqarfiup tusagassiutinut nalunaarummi oqaatigaa.

Tusagassiutinulli nalunaarut taanna maanna utertinneqarpoq, KNAPK-li Royal Greenlandilu KNR-imut ilisimatitsipput suli isumaqatigiinniartoqartoq.

- Nipisat suaannik qanittukkut tunisassiulertoqarnissaa tamanit kissaatigineqarlunilu neriuutigineqarpoq, Royal Greenlandimi attaveqatatigiinnermut pisortaq Masaana Egede oqarpoq.

AAMMA ATUARUK Aalisartut Royal Greenlandimut akerliussutsimik takutitsisut: Nipisaat akikippallaarput

Pisortatigoortumilli isumaqatigiissusiortoqartinnagu isumaqatigiissut KNAPK-mit Royal Greenlandimiillu atsiorneqaqqaassaaq.
 Sulili atsioqatigiittoqanngilaq, nipisallu suaannik tunisassiorneq suli aallartissinnaanani.

KNR-ip paasisai naapertorlugit Royal Greenland kiilumut 22 koruuninik akeqartitsiniarpoq, KNAPK-li isumaqarpoq tamanna annikippallaartoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq