Nipisap nerisassiassat Nunatsinneersut pingaartikkaluarpai
Piginnittuusimasulli, Rune Collinip nerisassianik Nunatsinneersunik siunissami atuiinnarnissani pingaartippaa.
- Nerisassiat Nunatsinneersut uummammioraakka, aamma pingaartittuaannassavakka, neriniartarfik Nipisamik piginnittuusimasoq, Rune Collin oqarpoq.
Aamma atuaruk Nipisap isertitakinnera matuneranut pissutaavoq
Nipisap matunera tusarliunneqarmat ajuusaartut amerlapput. Kuupik Kleist, Nunatta nerisassaataanik pingaartitsilluni siornatigut oqartartoq, ajuusaartunut ilaavoq.
- Neriniartarfiit Nunatta pissarititaanik sassaalliisartut ikitsuarakasiugamik, taamaammat iluatinnaraluaqaaq, Kuupik Kleist oqarpoq.
Igasutsialaat
Nipisa igasunik nuimasunik, kingornatigullu igasutsialattut toqqarneqartunik arlalinnik aamma ilinniartitaqarnikuuvoq. Martin Manley taakkununnga ilaavoq, Nipisamilu ilikkagaqarluarsimalluni oqarpoq.
- Piniartut aalisartullu pisaannik taamani atuisorujussuuvugut. Nerisassiassat ilisimalluakkatta qanoq ililluta nutaaliarisinnaaneri pillugit Rune isumassarsiarpassuaqartarpoq, Martin Manley oqarpoq, ilanngullugulu oqarluni, Collinip nerisassiassanik Nunatsinneersunik atuinissani siunissami ingerlateqqiinnassagaa neriuutigalugu.
Aamma atuaruk Martin Manley 2005-mimi igasullammanngorpoq
Nipisamilu piginnittuusimasoq taamaaliornissaminut pilersaaruteqarpoq, tassami Katuap neriniartarfiutaani, Cafétuami, igasut pisortaattut septembarip aallaqqaataanit atorfeqaleruni nerisassiassanik Nunatsinneersunik atuiniarluni oqarpoq.
- Cafétuaq nerisassiassanik Nunatsinneersunik atuereerpoq, taamaattoqaannarnissaalu qularinngilluinnarpara, Rune Collin oqarpoq.
