Nipisap isertitakinnera matuneranut pissutaavoq

- Aningaasat pissutaallutik taamaattoqarpoq. Ukiuni kingullerni suliffeqarfiuteqarnissaq ajornakusoorsimavoq. Soorunami tussunngunarpoq, aalajangernerli eqqortuuvoq, Rune Collin oqarpoq.

Neriniartarfik nerisassanik immikkut soqutiginarsakkanik sassaalliisartoq nersornaatisisaraluarpoq, aammattaaq igasunik ilinniartitsisarsimapput igasullammattut kingorna taaneqartartunik.

Suliffeqarfiulli ingerlaannarnissaa anguniarlugu aningaasanik isaatitsiuarnissaq ajornakusoorsimavoq.

- Tuniniaanerup annikippallaarnera, tassa imaappoq, ukiut siuliinisulli aningaasanik atuisoqarpallaanngilaq. Nuummi aningasat kaaviaartinneqartut ikiliartortillugit isertitagut ikiliartorsimapput, Rune Collin oqarpoq.

AAMMA ATUARUK Neriniartarfik Nipisa matuvoq

Isertitat ikilisut

Nipisap neriniartarfinni ukiuni kingullerni aningaasanik isertitakinnerulerneq kisimiilluni nalaatinngilaa.

Thailandimiut nerisassaataannik sassaalliisarfiup Charoen Pornip aamma isaatitsineq annikinnerusoq maluginikuuaa. Ukiup aappaa avillugu aatsaat taama ingerlanerliorfiutigaaq, Charoen Pornimi piginneqataasoq Jørgen Pedersen oqarpoq.

Taassuma aamma illoqarfiit annersaanni aningaasat kaaviaartu ikinnerulersimanerat maluginiarsimavaa.

- Ajornanngitsuararsuuvoq, aningaasarlioraannimi illoqarfimmukartarneq tassaavoq sipaarfigineqartartoq siulleq, Jørgen Pedersen oqarpoq, taannali isumaqarpoq neriniartarfiutillit aningaasarsiornerat pitsanngoriartoqqilersoq.

Alianarpoq

Tamannali Rune Collinip neriniartarfiutimi Nipisap matunissaanut aalajangerneranut allanngortitsinngilaq.

- Ajornaatsuinnaanngilaq. Alianarpoq. Ukiorpassuarnilu ajunngitsortai amerlaqisut eqqarsaatigissagaanni nuannaarnarpoq. Neriniartarfiullu matunissaanut aalajangerneq ajornarsimaqaaq nuannernanilu. Aalajangereerpungalu, Rune Collin oqarpoq.

Rune Collin septembarip aallaqqaataani igasut naalagaattut Cafétuami sulilissaaq.