Neriniartarfik Nipisa matuvoq
Neriniartarfiup ukiorpassuarni qullersaa igasullu naalagaat Rune Collin neriniartarfiup Facebookimi quppernerani taama allaaserisaqarpoq.
- Piffissami sivisuumi eqqarsaatigereerlugu neriniartarfiup matunissaa aalajangiupparput. Ukiut 16-it ingerlatsilluaqaluta neriniartarfiuvugut kalaallillu iggaviannik ineriartortitseqataalluta ullumikkullu killiffigisaanut suleqataalluta, Rune Collin allappoq.
Tamatumunngalu peqatigitillugu inuppassuit Nipisap nerisassiaanik kalaallit nerisassiassaataannik soqutiginarluinnartunik tunngaveqarluni nerisassiarineqartunik neriartortarsimasut qujassuteqarfigalugit:
- Neriartortartut tamaasa qutsavigaavut minnerunngitsumik piniartut aalisartullu nerisassiassanik pitsaanerpaanik ukiorpaassuarni pisiffigisartakkavut qutsavigaavut. Aamma naatitanik naatinneqarsinnaasunik pitsaanerpaanik naatitsisarsimasunut qujanaq, igasut naalagaat Rune Collin Facebookimi tassa taama allappoq.
