Martin Manley 2005-mimi igasullammanngorpoq

Nunatsinni igasutut ilinniarsimasut Narsami Inuili-mi iggarinneqqusaanneranni, ukiut pingajussaanik Nuummi Nipisami igasuusumit ajugaasoqarpoq. Tamatumuuna igasoq Martin Manley ukioq manna ajugaasuulluni.

-Kalaallit nerisassaataat neqit tamarmik, nammineq mamassutsimikkut pitsaalluinnartuupput. Uanga nammineq aqissip puuiiai panertut, kakillarnat paarnartai aammalu tupaarnat nerisassiannut akuutissatut nassarpakka. Kisianni nerisassiorama tupaarnat kakillarnallu paarnartai kisiisa tuttup quttoramernganut kissartuliannut akuutissatut atorpakka, Martin Manley nuannaaqisoq oqaluttuarpoq.

Igasunngornianit Kristine Biilmann Hotel Arctic-mi Ilulissani ilinniartuusoq ajugaasuuvoq. Taakku kissartuliaralugit kapisilik raajallu.

Nummer 1 –usut tamarmik ”Ukioq 2005” –ip igasullammaata jakkia qernertoq pissarsiarivaat, taanna tuttut nassuinik qiperukkanik attateqarpoq.

Inuili-mi ittuusoq Esben Toftdahl oqarpoq, kikkut nummer 1 – 2 – 3 –ngussanersut nalilerniaramikku nalunaaquttap akunneri marluk missaat atorsimallugit.

Peqataasut tamarmik normulersugaasimapput, dommeriusullu ilisimasimanngilaat nerisassiat kikkunnit nerisassiarineqarsimanersut.

-Unammersuartut Point-imikkut imminnut qaningaarmata kina ajugaasuussanersoq aaliangissallugu dommeriulluni ilungersunaqaaq, Esben Toftdahl oqarpoq.