Nipisanniarneq aallartingajalerpoq

Nipisanniarnermulli atatillugu arlalinnik maluginiagassaqartoq Aalisarnermut, Piniarnermut Nunalerinermullu Naalakkersuisoqarfiup allaaseraa.

Nipisanniarnermi malittarisassat nutaat siorna 2015-imi atuutilersinneqarput.

Tassa, kitaata sineriaani aqutsiveqarfiit ukioq manna arfineq-marluussasut nalunaarutigineqarpoq, aqutsiveqarfiillu ataasiakkaarlugit pisassinneqassapput, ullunilu amerlanerpaani 47-ni taakkunani aalisartoqarsinnaassalluni.

Ullut aalisarfiusimasut 47-t nallerneqarpata aalisarneq unitsinneqassaaq, aqutsiveqarfinnilu pisassiissutit ullut 47-t nallertinnagit nungussimappata aalisarneq unitsinneqassalluni.

Aqutsiveqarfimmi aalisalernissaq qaqugu aallartinneqassanersoq sumiiffinni aalisartut peqatigiiffiisa tunitsiviisalu isumaqatigiissutigisassavaat, suaallu inerissimalerpata aatsaat sumiiffinni ataasiakkaani aalisartoqarsinnaalernissaa pingaaruteqartoq Naalakkersuisut nalunaarutigaat.

Nipisanniarsinnaanermut akuersissuteqartoqassaaq, akuersissullu qinnutigineqarsinnaavoq, aqutsiveqarfinnullu tamanut atuutissalluni.

Nipisanniarnermut malittarisassat Naalakkersuisut nittartagaanni takuniarneqarsinnaapput.