- Aningaasarpaaluit annaavagut, Glenn Møller oqarpoq. Taassuma ukioq kingulleq ilinniarnertuunngoramili nipilersorneq inuuniutigilerpaa.Assi: PRIVAT

Nipilersortartoq coronap ajornartorsiortitsinerani: 100.000 koruunit sinnerlugit annaavakka

Nipilersortartut nualluutip coronavirusip nalaani aningaasarpassuarnik annaasaqassapput. Taamaattumik Nipilersortartut peqatigiiffiat naalakkersuisunut ikiorsissuutissanik piumasaqarpoq.

Glenn Møller inuussutissarsiutigalugu nipilersortartuuvoq. Taassuma nualluut coronavirus misillerfigingaatsiarpaa.

- Aningaasarpaaluit annaavagut, Glenn Møller oqarpoq. Taassuma ukioq kingulleq ilinniarnertuunngoramili nipilersorneq inuuniutigilerpaa.

- Allamik isertitaqanngilanga nipilersorlunga aningaasarsiannguakka, Glenn Møller oqarpoq.

Tusarnaartitsinissat illoqarfinni assigiinngitsuni pisussat nualluut coronavirus siammatsaaliorniarlugu taamaatiinnarneqarput ilaallu kinguartinneqarlutik.

Nuummi inuit amerlanerpaamik qulit ataatsimoorsinnaasut, oqartussat inassutigaat.

Glenn: Misillerfigerujussuarpara

- Misillerfigisorujussuuara, nipilersorfissat ikinngitsut annaavakka, 100.000-it sinnerlugit qaammatit marluk iluini annaasaraagut, minnerpaamik, Glenn Møller oqarpoq. Taanna nunatsinni nunanilu allani nipilersortarpoq.

AAMMA ATUARUK Corona nipilersortartunut akisussasoq

Isertitassat amerlasuut annaaneqartussanngortut, Nipilersortartut peqatigiiffiata Kalaallit Nipilersortartut ilimagereerpaa.

- Tusarnaartitsinerit taamaatinneqanngikkunik kinguarterarneqarput. Nipilersortartut ataasiakkat nipilersorneq inuussutissarsiutigaat. Piffissaq tamaviaarnartoq atulerpaat allatulli ineqarnermut akiliisartussaagamik nerisassarsisarlutillu, peqatigiiffimmi siulittaasoq Inunnguaq Petrussen oqarpoq.

Aningaasatigut ikiorsiisoqarnissaa piumasaraat

Taamaattumik peqatigiiffiup aningaasatigut piaartumik ikiorsiisoqarnissaa piumasaraat, nipilersortartut coronavirus pillugu ajornartoorfimmi ikiorserumallugit.

- Nipilersortartut Kattuffianninngaanniit innersuussutigivagut massakkut iluatsereersoq kalallit nipilersugaannik radiokkut appisimaaqattaartoqarnissaa, Inunnguaq Petrussen oqarpoq.

AAMMA ATUARUK  Coronavirusip ajornartorsiortitsinera: KNR-ip nipilersukkat kalaallisoortut kisiisa appittassavai

Innersuussutip aappaa tassaavoq nunarput tamakkerlugu nipilersortartut immiussaannik videokkut imaluunniit KNR-ip producerigaannik KNR-TV-kkut aallakaatitsisoqaqattaarnissaa.

Naalakkersuisunut saaffiginnittoq

Innersuussut kingulleq naalakkersuisunut saaffiginnippoq:

- Kingullerlu innersuussutigisarput nipilersortartuninngaanniit tassa naalakkersuisunut siunnersuutigivarput sulinissamut aningaasarsiutaasinnaasoq qinnuteqarfiusartoq maajip aallaqqaataani killeqartoq ammarneqarnissaa, Inunnguaq Petrussen oqarpoq.

Innersuussutit iluarisimaarlugit soqutiginartillugillu Glenn Møllerip oqaatigaa.

Nunatsinni inuussutissarsiutigalugu nipilersortartut aqqaneq marluupput.

Isummersuutit