Corona nipilersortartunut akisussasoq
Tusarnaartitsinissat illoqarfinni assigiinngitsuni pisussat taamaatiinnarneqarput ilaallu kinguartinneqarlutik.
Tamanna pivoq Nunatta nakorsaanera inassuteqarmat inuit 100-nit amerlanerusut illup iluini aaqqissuussinerni katersuunnaversaassasut. Nipilersortartut peqatigiiffiata Kalaallit Nipilersortartut ilimagaa isertitassat amerlasuut annaaneqartussanngortut.
- Tusarnaartitsinerit taamaatinneqanngikkunik kinguarterarneqarput. Nipilersortartut ataasiakkat nipilersorneq inuussutissarsiutigaat. Piffissaq tamaviaarnartoq atulerpaat allatulli ineqarnermut akiliisartussaagamik nerisassarsisarlutillu, Inunnguaq Petrussen oqarpoq.
- Nipilersortartut allat aalajangersimasumik suliffeqarput sunngiffimmi nipilersortartuullutik. Taakku isertitassanik annaasaqaraluarlutik ingerlaqqissaqqaarput. Qujanartumik imerniartarfinniit ilisimatinneqarput nipilersortitsinissat kinguartiinnarneqartut nualluussuaq corona tuniluukkunnaarpat nipilersortoqarumaarluni, Inunnguaq Petrussen KNR-mut oqarpoq.
Pikialaaritsineq Arctic Sounds Festival Sisimiuni apriilip qulingiluaat aallartittussaagaluaq aningaasarpassuarnik atuiffiusarpoq.
Aningaasarpassuit
Pikialaartitsineq kinguartinneqarpoq qaquguli pinissaa ullulerneqarani.
AAMMA ATUARUK Ministeriuneq nunatsinnut: Iluaqutaasinnaasut tamaasa atulersigit
- Angalanerinnarmut aningaasartuutit 6-700.000 koruuniupput. Billetit tamakkerlugit suli pisiarineqanngillat billettilli allanngortinneqarsinnaanngitsut 250.000 koruunit naligannut pisiarereerput. Qujanartumilli Air Greenland nalunaarpoq billettit allanngortinneqarsinnaanngikkaluit ullui allanngortinneqarsinnaalersut. Taamaasilluta aningaasarpassuit annaanissaat pinngitsoortussanngorpoq, Arctic Sounds Festivalimit Jacob Froberg KNR-mut oqarpoq.
- Assigiinngitsunik arlalinnik suleqateqarpugut. Taamaattumik nualluussuaq corona qaangiuppat nutaamik ulluliiumaarpugut, Jacob Froberg oqarpoq.
AAMMA ATUARUK Coronavirusip ernumassutigineqarnera: Atuarfiit timmisartuussinerillu matulersut
Kalaallit Nipilersortartut kultureqarnermut naalakkersuisoqarfik attaveqarfigaa maanna corona pissutigalugu kulturilerineq unikkallarmat. Nipilersortartut arlallit suliaqarnissamut aningaasaliissutinik namminersorlutik oqartussanut qinnuteqartarput qinnuteqarfissamullu killigitinneqartoq tassaavoq maajip aallaqqaataa.
- Namminersorlutik oqartussat attaveqarfigaavut. Tusarnaartitsinerit aliikkusersuinerillu taamaatiinnarneqanngikkunik kinguartinneqarput. Taamaattumik pitsaassagaluarpoq suliaqarnissamut aningaaliiffigineqarnissamut qinnuteqarnissamut ulluliussaq atorunnaarallarpat, taamaasillutik nipilersortartut angerlarsimaffimminni erinnanik suliaqarsinnaapput akissarsiaqarlutik, Kalaallit Nipilersortartut siulittaasuat Inunnguaq Petrussen oqarpoq.
AAMMA ATUARUK Aallarnissat taamaatikkusuppiuk? Angalatitseqatigiit aningaasanik utertitsisiinnaallutillu allanngortitsisinnaasut
Nualluussuup coronap kulturimut sunniutai pillugit KNR-radiomi pingasunngornermi nalunaaqutaq aqqanermut oqallittoqassaaq kulturilerisut peqataaffigisaannik. Oqallinneq sisamanngornermi unnukkut KNR-TV-mi nalunaaqutaq 20.00 aallakaatinneqassaaq.
