ASSIT Nipaatsumik akerliussutsimik takutitsineq ersarissoq

Meeqqat – Uagut akisussaaffipput. Nuummi akerliussutsimik takutitsisoqarmat oqariartuummi pingaarnerpaavoq, tassani innuttaasut 150-it sinneqartut Kommuneqarfik Sermersuumik iluarisimaarinninnginnertik takutinniarpaat.
Allattoq Kenneth Elkjær
juunip 13-at 2017 17:24

Nipaatsumik akerliussutsimik takutitsineq ersarissumik oqariartuuteqarfiuvoq. Marlunngornerup ualikkuani akerliussutsimik takutitsinermi amerlasuut Nuummi kommuneqarfiup silataanut takkummata oqariartuutaat erseqqilluarpoq.

Akerliussutsimik takutitsisut Kommuneqarfik Sermersuup kommunimi meeqqani inuusuttunillu sumiginnaaneranik iluarisimaarinnginnertik takutinniarpaat. Tamanna Nakkutilliisuutitat nalunaarutaanni sapaatip akunnerata siuliani saqqummersumi atuarneqarsinnaavoq. Kommunalbestyrelsit nalunaarut saqqummersinneqarmalli marlunngornermi siullermeerlutik ataatsimiipput.

Akerliussutsimik takutitsiartorlutik takkuttut nipaakkaluarlutik kommunep illorsuata saani inuit 150-init amerlanerusut katersuussimapput, takkuttut Nakkutilliisut nalunaarummi kalaallillu tusagassiorfiisa allassimasaannik allagartalisarput.

AAMMA ATUARUK Akisussaaffiit agguataarneri ersarissuussapput

Meeqqanik sumiginnaanerup nipaarsaarutaanera sivisuallaarsimasoq akerliussutsimik takutitsinissamik aaqqissuisut nassuiaatigaat. Nipaatsumik akerliussutsimik takutitsineq iliuuseqartitsissaaq oqariartuutigineqarpoq.

Akerliussutsimik takutitsinermut kommunalbestyrelsemut ilaasortat amerlanerit Asii Chemnitz Narup siulersortigalugu takkussimapput.

Kommunip politikerii akerliussutsimik takutitsisut akornatigut arriitsumik ingerlammata pisoq qanoq ilungersunartiginersoq kiinaasigut takuneqarsinnaavoq. Akerliussutsimik takutitsisut allagartarsuinit allassimasut atuaajutigalutik ingerlanerminni sikiimisarlutik oqaaserisaat ataasiinnaavoq, tassa haluu.

AAMMA ATUARUK Meeqqat navianartorsiortut aqutsilluarnikkut ikiorserluarneqarsinnaapput

Kommunalbestylsemi ilaasortat ataatsimiittarfimminnut isinnginnerminni akerliussutsimik takutitsineq naggaserlugu nipaatsumik akerliussutsimik takutitsisut saavanni partiikkaarlutik ataatsimut qeqqisimariarlugit naggaserpaat.

Akerliussutsimik takutitsisut seqinnarissuartumi avissaakaannginnerminni politikerit ataatsimiittarfimminnut iseriartortut erinarsorfigaat, erinarsuut Pilluaqaagut atorneqarpoq.

Nivi Heilmann akerliussutsimik takutitsinermik aaqqissuussisut ilagaat. Taassuma sulinerup nalaani akerliussutsimik takutitsisoqaraluartoq taama amerlatigut takkummata nuannaarutigaa.

- Nuannersorujussuuvoq. Taama amerlatigisut takkummata attorteqaanga, KNR-imut oqarpoq.

AAMMA ATUARUK Meeqqat illersuisuata nakkutilliisut nalunaarusiaat tupaallaatigaa