Nakkutilliisut Akisussaaffiit agguataarneri ersarissuussapput
Isumaginninnermut naalakkersuisoqarfiup ataani nakkutilliisut nalunaarusiaminni inerniliipput Nuummi meeqqat ikiortariallit kommunimit 'sumiginnagaasimasut'.
Kommuneqarfik Sermersooq kommunini kisiartaalluni nakkutilliisunit isornartorsiorneqanngilaq. Qeqqata Kommunia februaarimi isornartorsiorneqarpoq, tamannalu sioqqullugu Kommune Kujalleq Qaasuitsullu Kommunia aamma isornartorsiorneqarput.
Sara Olsvig naapertorlugu, kommunit isumaginninnikkut ajornartorsiuteqarnerat taamaalilluni ersarippoq.
- Taamaammallu Naalakkersuisut ukiaq naalakkersuisunngoratta, isumaginninnermut aqutsisoqarfimmik pilersitsinissamut aningaasaliivugut, aammalu meeqqat tapersersorneqarnissaannut inatsit nutaaq Inatsisartut massakkut naammassiartorneranni naammassineqartoq ilungersorluta naammassiniarsimavarput, isumaginninnermut naalakkersuisoq Qanoruumi ippassaq taama oqarpoq.
AAMMA ATUARUK Meeqqat illersuisuata nakkutilliisut nalunaarusiaat tupaallaatigaa
Inatsit sapaatit-akunnerata siuliani akuersissutigineqarpoq, kommunillu ikiornissaannik suliap aallartissinnaanngornera Sara Olsvigip qilanaarivaa.
Aperineqaramilu inatsisip kommuninit malinneqarnissaa qanoq qulakkeerniarneraa, ima akivoq.
- Inatsisiliornerup saniatigut piareersarsimasagut tassaapput, nalunaarutit sisamat. Taakkulu nassuiaqqissaartussaapput, sullissisut kikkut, suut qaqugukkut akisussaaffigineraat, isumaginninnermut naalakkersuisoq Sara Olsvig taama oqarpoq.
AAMMA ATUARUK Sermersuumi isumaginninnikkut nakkutilliineq illersorneqarsinnaanngilaq
