Nioqqutissat nutaat tikimmata soorluli juulliaraannartoq
Ulluinnarni atortussanik pisiniarfinni ataasinngornerup ullaavani ulapputtoqangaatsiarpoq. Nioqqutissammi nutaat sivisuumik utaqqineqarsimasut Danmarkimiit tikissimammata ulappussimapput.
- Ullumikkut soorlu juulliaraq, maqaasisimaqisagummi naatitat, nioqqutissat nillataartinneqartartut qallersuutissallu tikissimapput, Nuummi kujataanilu Brugsenimi tuniniaanermut pisortaq KNR-imut taama oqarpoq.
Teknikkikkut ajornartoortoqarnera pissutaalluni assartuut Tukuma Århusimi talittarfimmiit pilersaarut malillugu aallarsinnaasimanngilaq. Tamanna ulluinnarni atortussanik pisiniarfinni ulluni qulingiluani quliniluunniit nioqqutissanik amigaateqartitsisimavoq.
Naak nioqqutissat nutaat tikissimagaluartut aamma ajortortaqarpoq. Suummi tamarluinnarmik tuniniarneqarsinnaanngitsut tuniniaanermut pisortap oqaluttuaraa.
- Nioqqutissat kusanarnerusut ilaat soorlu salaatit broccolillu nutaanngilisimapput. Qallersuutissallu amerlasuut ulloq atorunnaarfissaat nallereersimavoq, tuniniarsinnaajunnaarsimavagullu, tuniniaanermut pisortaq oqarpoq.
Tamakkerlugu isiginnittoqarsinnaajunnaartoqarnera
Naak nioqqutissat nutaat tikissimalereeraluartut, nioqqutissat ilaat suli ilitsivinnut iliorarneqarsimanngillat. Tamassumunnga pissutaavoq nioqqutissat tuniniarneqarsinnaajunnaarsimaneri imaluunniit pisiniarfinnut suli apuussimannginneri.
Kent Helberg oqarnera naapertorlugu, sapaatip akunnerata naanerani umiarsuaq alla pilersaarut malillugu tallimanngorpat Nuummut tikippat nioqqutissat allat pigileqqinneqassapput.
Kinguaattoortoqarsimanera pissutaalluni nioqqutissat amerlanerit sapaatip akunnerata naanerani umiarsuarmut tikittussamit usineqartussanngortinneqarsimapput, Kent Helberg oqarpoq.
Taassumalli nioqqutissat sorliit ullumikkut pissarsiarissanerlugit tamakkiisumik allassimasuutiginngilai, taamaammallu tamanna juulliaqqami poortukkanut assersuusiarai.
- Containerimik ammaagaangatta soorluli juulliaqqami poortukkamik ammaalluni. Nalusarparput nioqqutissanik sorlernik imaqarnersoq, imarisaali ajorinngiivittarpagut, taanna oqarpoq.
Pingaarnerpaavormi pisiniartut nioqqutissanik qinigassaqaqqilerlutillu nillataartitsivitsik immersinnaanngoqqinnissaat, taanna oqarpoq.
Tunisatigut isertitakinnerunissaq pinngitsoorneqarsinnaanngitsoq
Kinguaattoornikkut nioqqutissanik nutaanik neqerooruteqarnerup annikinnerusimanera pissutaalluni tunisatigut pisiniarfinnut isertitakitsitsisimavoq, Kent Helberg oqaluttuarpoq. Nioqqutissanik assartortitsinermut akigitinneqartoq pisiniarfinnut akigitinneqaannassaaq, taamaammallu utaqqineq pisiniarfinnut akisussalluni.
- Kinguaattoorneq suliassaqarfiit ilaanni uatsinnut akisussaaq, taanna oqarpoq.
Tunisatigut isertitakinnerunissaq ilimagineqareeraluartoq pisiniarfiit immerneqaqqinnerussammata nioqqutissat kiisami takkunnissaanut taanna qilanaarpoq.
- Akunnialuit tulliuttut ingerlanerani qanoq isikkoqarumaarnera takujumaarparput. Pisisartugulli kiffartuunneqarsinnaanngoqqinniassammata pisiniarfinnut nioqqutissat piaarnerpaamik agguaanneqarnissaat maannakkut pingaarnerpaavoq, taanna oqarpoq.
Pisiniat nuannattut
Pisiniallumi pisiniarfinni nioqqutissanik ilitsivinneeqqilersimasunit toqqagassaqaqqilernertik nuannaarutigingaarpaat.
- Immuup sukkuanik naatitallu ilaannik sapigalittut nerisassiornissannut nerisassanik amigaateqarpunga, Nuummi Brugsenimi Haldora Fleischer KNR-imut taama oqaluttuarpoq.
Nioqqutissat pigileqqinneqarsimasunik toqqagassaqaqqilersimanini nuannaarutigingaarlugu nerrivimmut qaqilluni qitingajassimalluni taanna oqaluttuarpoq.
Pisiniap allap naatsiianik, naatitanik, uanitsunik hvidløginillu koorimut ilisisinnaanngoqqinnini aamma nuannaarutigaa.
- Danmarkimi feeriarninniit uteqqammerpunga, 2023-milu nunatsinni nioqqutissanik taamarsuaq amigaateqartoqarnera tupaallaatigilaarpara, Mátârak Olsen, nillataartitsivini immeqqinniarlugu pisiniartoq taama oqaluttuarpoq.
Tuniniaanermut pisortap, Kent Helbergip, pisiniarfiit ullumikkut nalinginnarmit ulapinnerunissaat naatsorsuutigaa, nioqqutissaqaqqilersimanerami ingerlaannaq tusarneqartarpoq, taanna isumaqarpoq.
