Nikkulaat Jeremiassen Inatsisartunut ilaasortanngoqqissagunarpoq
Siumumeersoq Laura Táunâjik Uitsatikitseq Inatsisartunut ilaasortaanerminit tunuarpoq.
Laura Táunâjik Uitsatikitseq mikisumik meeraqarami naartoqqikkamilu ilaquttani Kuummiuni najugallit qimallugit aallaqattaaqqiniarnani.
Maannali kingoraartaasussamik peqalereertoq, atianilli avammut suli nalunaaruteqartoqanngitsoq, Siumup siulittaasuata tulliata Karl-Kristian Kruse oqarpoq.
Kinali kingoraartiussanersoq avammut suli nalunaarutigineqanngitsoq, Karl-Kristian Krusep erseqqissaatigaa.
Niaqornaarsummeersoq Nikkulaat Jeremiassen, Inatsisartunut 2018-imi qinersinermi 140-init taaguunneqartoq, Laura Táunâjik Uitsatikitsumut kingoraartaasussanngorpoq.
Laura Táunâjik Uitsatikitsip Inatsisartunnit tunuarnera, Inatsisartut siulittaasoqarfiannit suli nalunaarutigineqanngitsoq, Karl Kristian Kruse oqarpoq.
Laura Táunâjik Uitsatikitsilli Inatsisartunit tunuarniarluni nalunaarutigereermagu sinniisumit kingoraarteqartariaqassaaq.
Inatsisartunullu 2018-imi qinersinermi taaguussinerit aallaavigalugit Nikkulaat Jeremiassen Inatsisartunut sinniisutut ilaasortanngussasoq, Karl-Kristian Krusep naatsorsuutigaa.
Nikkulaat Jeremiassen Laura Táunâjik Uitsatikitsip erninermut atatillugu siornatigut sulinngiffeqarnerani Inatsisartunut sinniisutut ilaasortaareerpoq.
AAMMA ATUARUK Laura Táunâjik Uitsatikitseq Inatsisartunit tunuarniuteqarpoq
Nikkulaat Jeremiassen arlaannik pissuteqarluni Inatsisartunut iserusussanngippat, sinniissussap aappaa isissaaq tassalu Mala Høy Kúko 138-nik taaguunneqarsimasoq..
Inatsisartut septembarip ulluisa 25-anni ukiakkut ataatsimiilerpata, Nikkulaat Jeremiassenip Inatsisartunut ilaasortaaqqilernissaata pisortatigut nalunaarutigineqarnissaa naatsorsuutigineqartoq, Siumup allattaanera, Miki Jensen, oqarpoq.