Laura Táunâjik Uitsatikitseq Inatsisartunit tunuarniuteqarpoq

Laura Táunâjik Uitsatikitseq mikisumik meeraqarpoq, naartoqqillunilu. Taakkulu salliukkusuppai.
-Taamatut aaliangerpunga ilaquttakka pilliutigeqattaaqqinniannginnakkit qimaqattaaqqillugit. Tassa immaqa tunngavik taamannak naatsumik nassuiarsinnaavara, Laura Táunâjik Uitsatikitseq oqarpoq.
septembarip 03-at 2020 11:59

Siumumeersoq Laura Táunâjik Uitsatikitseq Inatsisartunut ilaasortaanerminit tunuarpoq.

Laura Táunâjik Uitsatikitseq mikisumik meeraqarami naartoqqikkamilu ilaquttani qimallugit aallaqattaaqqikkallarniarnani, Inuiaat Tillernerannut oqarpoq.

-Taamatut aaliangerpunga ilaquttakka pilliutigeqattaaqqinniannginnakkit qimaqattaaqqillugit. Tassa immaqa tunngavik taamannak naatsumik nassuiarsinnaavara, Laura Táunâjik Uitsatikitseq Inuiaat Tillernerannut pingasunngormat oqarpoq.

Aalajangerniarneq oqittuinnaasimanngitsoq taanna nassuiaavoq. Pingaarnersiuisariaqarsimavorli.

- Nuunnikuugatta nunaqarfimmut Kuummiunut, tassanilu ilaatigut aamma atuarfimmi sulilerlunga taavalu nuunuutitaarnikuulluta aammalu suli nuunnutitaaqqilerluta. Taamaattumik nukissaqarfiginagit allatut ajornartumik allanik iperaasariaqarlunga, Laura Táunâjik Uitsatikitseq oqarpoq nangillunilu.

Siunissami inatsisartunngoqqissinnaasoq 

- Misigisimagaluarlunga suli sukataarsinnaallunga angusaqarusullunga sulilu aamma suliassarpassuaqarlunga. Kisianni imatut misiginarsigami: Laurajaa imminut tusarnaalaarit,Laura Táunâjik Uitsatikitseq oqarpoq.

Laura Táunâjik Uitsatikitsip tunuarnissamut qinnuteqaataa Inatsisartut siulittaasoqarfiata tigusimavaa, sulili suliarinagu. Inatsisartullu siulittaasoqarfiata tallimanngorpat nalilersussagaa, siulittaasup Vivian Motzfeldtip uppernarsarpaa.

Kommunalbestyrelsemiiginnassaaq

Laura Táunâjik Uitsatikitsumut kingoraartissaq kinaassanersoq suli ilisimaneqanngitsoq Motzfeldt paasissutissiivoq. Siumut, Laura Táunâjik Uitsatikitsip ilaasortaaffigisaa, kingoraartaasussamik qinersinermi taaguunneqarnerit tulleriiaarneri tunngavigalugit innersuussuteqassaasoq, Vivian Motzfeldt oqarpoq.

Laura Táunâjik Uitsatikitseq Kommune Sermersuup siulersorneqarneranut ilaavoq. Kommunalbestyrelsemili suli ilaasortaassalluni taanna allappoq.