Nikku Inatsisartunut ivertinneqarli!
-Sapaatiummat unnukkut oqaluuserigatsigu. Nikkup ukiut arfineq pingasut matuma siorna pisoq pillugu Inatsisartunut ilaasortaasinnaajunnaarsinneqarnera eqqunngitsuliornertut isigaarput, pisumummi tunngatillugu suliaq ukiut pingasut qaangiunneranni matuneqarsimanera pissutigalugu Nikkup qinigaasinnaanngitsutut aalajangiiffigineqarnera eqqunngitsuliornertut naleqqutinngitsutullu isigaarput, Simigaq Grønvold Andersen knr.gl-imut oqarpoq.
Akerliussutsimik takutitsineq tallimanngorpat apriilip 12-iani nal. 16.30 pissaaq, aaqqissuisullu inuit Nikku Olsen tapersersorlugu ornigulluarnissaat neriuutigaat. Akerliussutsimik takutitsineq illoqarfiup qeqqani "Nivinngaaviup" eqqaani ingerlanneqassaaq. Aaqqissuisut najukkami tv-qarfiup Arfivik TV-p assiliiartornissaanik isumaqatigiissuteqarfigisimavaat, akerliussutsimik takutitsinerup ilaatigut ass. Qanoruumut ilanngunneqarnissaa siunertaralugu.
Akerliussutsimik takutitsinermut atatillugu aamma atsiornernik katersisoqassaaq, aaqqissuisullu atsiornerit taakku Naalakkersuisut siulittaasuannut Aleqa Hammondimut ingerlateqqinniarpaat.
-Amerlasuut akerliussutsimik takutitsinermut peqataanissaat neriuutigaarput, aamma illoqarfinni allani taamatut aaqqissuisoqarnissaanut kaammattuerusuppugut, Simigaq Grønvold Andersen knr.gl-imut oqarpoq.
