KNI Niels Thomsen siulittaasutut tunuartoq
Niels Thomsen KNI A/S-mi siulittaasutut ingerlaannartumik atuutilersumik tunuartoq siulersuisut aqutsisullu ullumi nalunaarfigineqartut, KNI A/S-imi siulittaasup tullia, Høgni Hansen tusagassiuutinut marlunngornermi unnukkut nal. arfineq marlunngulersoq taama nalunaaruteqarpoq.
Allattoq Merete Lindstrøm, Bikki P. Kleist
marsip 06-at 2018 19:37
- Siunissami sulinissannut piffissamillu pingaarnersiuinermik tamanna pissuteqarpoq Niels Thomsen taama tunngavilersuivoq.
- Ajuusaarutigaarput maanna KNI-p siulersuisuini siulittaasoq pikkorissoq piginnaasaqarluartorlu annaasussanngoratsigu - Niels Thomsen pisooqataalluinnarpoq KNI A/S-ip sorpassuartigut maanna nukittunerulersimaneranut, Høgni Hansen siulersuisut sinnerlugit taama oqarpoq
Niels Thomsen augustimi 2013-imi Naalakkersuisunit KNI A/S-imi siulittaasunngortinneqarpoq, ukiullu sisamat qaammatillu arfinillit siulittaasuusimalluni.
KNI A/S-imi siulittaasup tullia, Høgni Hansen sapaatip akunnerata tulliani siulersuisut inissititeqqinnissaasa tungaanut siulittaasunngorallassaaq.
Niels Thomsen Halibut Greenland ApS-imi pisortaavoq.