Niels Thomsen quarrissaartoq
![](/sites/default/files/styles/image_934x467/public/article_images/kunstgraesbane_1.jpg?itok=i2J7Aj1r)
Nunatsinni illoqarfinni pingasuni ivigaaraasanik qallikkanik arsaattarfiliornissaq pillugu apeqqut Demokraatit sinnerlugit inatsisartuni ilaasortap Niels Thomsenip paatsoorsimagaa, inatsisartut aningaasaqarnermut ataatsimiititaliaata siulittaasorisimasaanit oqaatigineqarpoq.
Aningaasanut inatsisissap aappaagumut atuuttussap suliarineqarnerani inatsisartuni ilaasortat amerlanerussuteqartut aalajangigaannik, Naalakkersuisut suusupaginninnerarlugit Niels Thomsenip pisuutippai.
Ivigaaraasanik qallikkanik arsaafiliornissamut 1 millionit koruunit ikinnerarlugit oqarnera ilumoortortaqarsinnaavoq.
Tamannalu nammineq pisuussutigigaa inatsisartut aningasaqarnermut ataatsimiititaliaani siusinnerusukkut siulittaasoq Olga. P. Berthelsen allappoq.
Niels Thomsenip inatsisartuni aalajangigassatut siunnersuutaa, tassa Sisimiuni Ilulissani Nuummilu ivigaaraasanik qallikkanik arsaaffiliornissat pilersaarusiorneqarnissaannut 2012-imi Aningaasanut Inatsisissatut siunnersuummi aningaasanik immikkoortitsinissamik Naalakkersuisut peqquneqarnissaannik Inatsisartut aalajangiiffigisassaannik siunnersuuteqarpoq.
- Siunnersuutaa arsaattarfiliortoqarnissaanik imaqanngilaq, kisiannili pilersaarusiorneqarnissaannik siunnersuutaalluni.
- Pineqartumili siunnersuuteqartup siunnersuutini paasisimanngilaa, tamannalu Naalakkersuisut akisussaaffigisinnaanngilaat, inatsisartut aningaasaqarnermut ataatsimiititaliami siornatigut siulittaasoq Olga P. Berthelsen taama allappoq.