Niels Thomsen: Aningaaseriviit taperserpaatigut
KNI-p siulersuisuni ulluinnarnilu aqutsisuni pifissami kingullermi taarsersuisoqaqaaq.
Taamaammat siulersuisut siulittaasuata nutaap aningaaserivinnik ataasinngormat ataatsimeeqateqarluni erseqqissartariaqarsimavaa, KNI aningaasarsiornikkut attartukkamigulluunniit ajornartorsiunngitsoq.
Niels Thomsenip tusagassiutinut ippassaq nalunaarutinik ullumi ullup qeqqata siorna itisilerumanngilaa.
KNI-p ataatsimeeqatiginninnikkut kissaatini pivaa, tassalu aningaaseriviit aningaasanik atukkiinertik attatiinnaraat.
- Ilisimalluinnarpara unammilligassaqaqaluta, paasilluarsinnaavaralu suliffeqarfissuarmi atorfiit inuttalerneqartussat aningaaseriviit qanittumik malittariumammatigit. Tamatuma tungaatigut naatsorsuutigineqarnitsinni qularutiginngilara piumasaqaatinik naammassinnissinnaajumaarluta, KNI-mi siulersuisut siulittasuat allappoq.
Aningaarserivik ataasiinnarluunniit Niels Thomsenimik Københavnimi ataatsimeeateqarsimaneq pillugu oqaaseqarumarpiangillat
Grønlandsbanken nipeqanngilaq, soorlu aamma Bank Nordik taamaattoq. Taanna svenskit aningaaserivianni SEB-imi immikkut ilisimasalimmut inersuussivoq, taannaasimarpasipporlu aningaaseriviit arlallit KNI-mi oqaloqateqarnermi sinniisaat. Taannali aamma oqarumanngilaq.
Aningaaseriviit KNI-mut atukkiisut tassaapput taariikkavut SEB, Grønlandsbanken og Bank Nordik; taavalu aamma Arbejdernes Landsbank, EBH Bank kiisalu tyskit aningaaseriviat Commerz Bank.
KNI-mi eqqissiviilliorneq aasaq naalersoq, Naalakkersuisut siulersuisuini ilaasortanik arlalinnik taarsersuereersullu, aallartippoq.
Pisortaq Claus Jensen sulisut 14 angerlartikkallareersimatsiarlugit soraarsitaavoq. Claus Jensen Peter Grønvold Samuelsenimit maanna taarserneqaqqagallarpoq, taavalu Jan H. Lynge aningaasaqarnermut pisortaagallarluni.
KNI-mi ulluinnarni aqutsisunik tarsersuinerup saniatigut, siulersuisuni ilaasortat pingasut aamma tunuarnikuupput. Taakkua saniatigut sulisut arlallit aamma soraarnikuupput, tassaasut aningaasaqarnermut pisortaq, aningaasarinermi pisortaq, amerlasuukkaanik pisiniartartoq kiisalu sulisoqarnermi pisortaq.
