New Yorkimi kiarujussuarmat aaqqissuussinerit taamaatinneqarput
Amerikami illoqarfissuarmi New Yorkimi sapaatip akunnerata naanerani kiarujussuarnera pissutigalugu aaqqissuussinissat arlaqartut oqartussaasunit taamaatinneqarput.
Festivalertoqarnerani nipilersortartoq John Legend, arsaattartoq Megan Rapinoe aamma TV-ikkut aallakaatitassiami " The Daily Show " aallakaatitsinermut aqutsisuusartoq Trevor Noah peqataasussaagaluarput.
Aaqqissuussinerit taamaatinneqarnerinut nalunaaruteqartuuvoq New Yorkimi borgmesteri Bill de Blasio.
Festivalertitsineq OZY festimik taaguuteqartinneqartoq illoqannginnersami Central Parkimi arfininngornermi sapaammilu pisussaagaluarpoq.
Qaammammut nunninneq siulleq 1969-mi pisoq Times Squaremi eqqaaniarneqartussaagaluartoq aamma taamaatinneqarpoq, borgmesterip oqaaseqartartua taama nalunaarpoq.
New York City-mi triathlonerluni sapaammi unamminissaq New Yorkimi oqartussaasunit sisamanngornermi taamaatinneqarpoq.
Amerikap kangisinnerusortaata sineriaani qiterpasinnerusortaanilu arfininngornermi sapaammilu 40-it sinnerlugit kiassangatinneqarpoq.
