Netanyahup Vestbredden naalagaaffimmut ilanngunniarpaa
![](/sites/default/files/styles/image_934x467/public/article_images/flickr_-_benjamin_netanyahu_with_greek_pm_-_03_0.jpg?itok=s0kwuRyM)
Israelip Palæstinamiullu akornanni eqqisseqatigiittoqarnissaanut atatillugu siunissami arlaatigut isumaqatigiissusiortoqassappat, Israelip Vestbreddenimi nunassarsiarisimasaanni innuttaasumik ataasinnguamilluunniit Isarelimut nuutsitsiniannginnini Netanyahup USA-p præsidentianut Donald Trumpimut erseqqissaatigisimallugu oqaatigaa.
Israelip Jeruusalaap kangisissortaani Golanillu qatsissortaanni piginnittuunermik annertunerujartuinnartumik takutitsereersorlu Vestbreddenimi nunassarsianik annertunerusumik suli sooq piginnittuunermik takutitsiniannginnersoq tv-qarfimmit Kanl 12-imit aperineqarpoq:
- Tullissaanut alloriarniarnersugut aperivusi. Akissut tassaavoq: Aap, tullissaanut alloriarniarpugut. Israelip oqartussaaffii annertusarniarpakka, Benjamin Netanyahu oqarpoq.
Israelimi inatsisartunut qinersisoqareerpat Israelip Palæstiinamiullu akornanni eqqisseqatigiittoqarnissaanut siunnersuumik USA saqqummiussinialersaarpoq. Israelimi marlunngorpat qinersisoqartussaavoq.
Eqqisseqatigiittoqarnissaanut siunnersuummi immikkuualuttunik arlaatigut ilisimatinneqarsimanersoq Netanyahu aperineqarpoq, imalu akivoq:
- Qanoq imaqartariaqarnersoq nalunngilara, oqarpoq.
Israelip Jordanip kuussuanit kimmut nunassarsiaasa Israelimit siunissami aqunneqartuarnissaat sulissutiginiarlugu Netanyahu oqarpoq, eqqisseqatigiittoqassappat nunassarsiat maanna oqartussaaffigineqartut Israelimit tigummineqartuarnissaat sulissutigerusullugu.
/ritzau/Reuters