Netanyahu sakkutuunut oqalugiarami: Alloriarnerit tullissaannut piareersimavisi?
Israelip ministeriunerata Benjamin Netanyahup sakkutuut Gazamut killeqarfiup nalaaniittut ullumi oqalugiarfigai:
- Alloriarnerit tullissaannut piareersimavisi? Alloriarnissammi tullia qanillivoq, Netanyahup sakkutuunut oqalugiarnerani assilisat allattoqarfiata saqqummiussimasaani takuneqarsinnaavoq.
Israelip sakkutuuisa Gazamut piffissami qaninnermi isaanissaat ilimagineqarpoq.
Gazap avannarpasissortaani innuttaasut Gazap kujasissortaanut qimagussorneqarsinnaanissaat Israelip periarfississimavaa. Tassungalu piffissaliussaq qaangiussimalerpoq, taamaaliornissamummi piffissaliussaq nunatta nalunaaqutaa naapertorlugu ullaap tungaani aqqanermut killeqarpoq.
Sakkutuut, qamutit sorsuutit qamutillillu Gazamut killeqarfiup nalaani katersuunneqarsimapput, Israelillu Hamasikkunnik piffissap tulliuttup ingerlanerani saassussinissaa ilimagineqarluni.
