Nersornaat sølviusoq Asii Chemnitz Narupimut tunniunneqarpoq
Asii Chemnitz Narupip kommunini Nunatsinnilu naalakkersuinikkut ilungersuuteqarsimanini nersorneqaatigaa, Inatsisartullu Siulittaasoqarfiata tamanna pillugu Nersornaat sølviusoq tunniuppaa.
Asii Chemnitz Narup, Inuit Ataqatigiit sinnerlugit Inatsisartunut 1999-imi qinigaavoq, Ilaqutariinnermullu Peqqissutsimullu 2003-mit 2006-ip tungaanut aamma naalakkersuisuulluni.
Kommunit 2008-mi kattussuunneqarnerisa kingorna Asii Chemnitz Narup Kommuneqarfik Sermersuunngortumi borgmesteriulerpoq, Inatsisartullu siulittaasuat Lars-Emil Johansen Asii Chemnitz Narupimut oqalugiaateqarnermini ilaatigut ima oqarpoq:
- Kommuneqarfik Sermersuumik pilersitsineq imaannaanngitsumik annertuunillu unammisassaqarfiusimavoq. Nunatta sermersua napillugu Nunatta kangiata kitaatalu akisussaaffigisimavat. Nalunngilarput naalakkersuinikkut piffissaq nukiillu annertuut atorsimagitit oqaluttuarisaanitta, kulturitta oqaatsittalu assigiinngitsut nalilgiimmik pineqarnissaat assigiinngisitaarnerullu kommunimi innuttaasunik tamanik nunatsinnillu pisuunnguallatsitsinissaa qularnaarniarlugu, Lars-Emil Johansen oqarpoq, nangillunilu:
- Aalajaatsumik anguniakkanillu toraagalimmik piumasuseqarnerit saamasumik pissuseqarnippit tunuaniippullusooq. Naalakkersuinikkut anguniakkatit nunarpullu eqqarsaatigalugu takorluukkatit sorsuutigisarpatit. Aamma nalunngilatsigit qinikkatut kulturikkut pikialaartitsinissamik pingaartitsisuusutit - minnerunngitsumik taakku oqallinnermik pilersitsisinnaagaangata eqqarsaatissanillu nutaanik tunisigaangata, Inatsisartut siulittaasuat Lars-Emil Johansen oqarpoq.
