Naqqiissut 4. oktobari nal. 13.18: Allaaserisatsinni Agathe Fontainip oqaaseqarfigisaa tassaanerarparput Manumina-mut tunngatillugu oqartoq. Taamaanngilaq, Peqqissutsimut Naalakkersuisoqarfik taama KNR-imut allappoq. Agathe Fontainip oqaaseqarfigisaa tassaavoq meeqqat illersuisoqarfiata MIO-p meeqqat nunatta peqqinnissaqarfiinit passunneqarlutik toqusut pillugit allaaserisaanut tunngapput, meeqqamut ataatsimut pinnani. KNR-ip kukkunini ajuusaarutigaa.

Manumina arfinilinnik ukioqarluni Dronning Ingridip Napparsimmavissuani sulisunit passunneqarluni toqunerata kingorna pisoq sapaatit akunnerit kingulliit inuiaqatigiinnni eqqartorneqangaatsiarpoq.

Suliaq nalinginnaanngitsoq Manuminamullu tunngatillugu suliaq ataasiinnaanngitsoq, Meeqqat Inuusuttullu Oqaloqatiginnittarfiat, MIO, tusagassiutinut marlunngornermi nalunaarutaani allaqqavoq.

Angajoqqaat meeqqaminnik napparsimasoorlutik nakorsiusserusukkaluarlutik nakorsiussiillutilluunniit tusaaneqanngitsutut misigisimasimanertik kamaatigalugu MIO-mut saaffiginnissimasut amerlapput – taakkualu ajorluinnartumik kinguneqarsimasortaqarput. Taamaammat MIO iliuuseqalertoqquseqqammerpoq.  

Peqqissutsimut naalakkersuisuusimasoq, Mimi Karlsen (IA), suliamut tunngatillugu apersorneqarusunngilaq. Agathe Fontainilli peqqissutsimut naalakkersuisutut akisussaaffik ataasinngornermi tiguaa, taassumalu oqaaseqarnissi kissaatigaa:

- Siullermik oqaatigerusuppara pineqartuni angajoqqaat meeqqallu assorsuaq qamuuna misiginneqatigigakkit. Taanna siullermik apuuteqqaarusuppara, aamma soorunami malinnaavugut. Massakkut naalakkersuisutut akisussaavunga, taanna oqarpoq nangillunilu:

- Suliat imaannaanngitsuupput. Kisianni suliassaapput aamma sulinissarput taanna qilanaaraarput aaqqitassanik aamma isigaluta aaqqiinissarput siunertarigatsigu, Agathe Fontain oqarpoq.

Inuit nakorsiarnissaminnut ersisut

Suliamut tunngatillugu Nuummi inuuttaasut aqqusinermi naapitatta ilaat KNR-imiit Manuminamut atatillugu apersorpagut. Taakkulu pakatsisimaarput nakorsiarnissaminnullu ersilersimallutik oqaatigaat.

Angajoqqaallu arlallit meeqqamik nakorsiunnissaat kajumeriunnaarpaat.

Agathe Fontainillu nakorsiarnissamik pisariaqartitsisut ersissuteqannginnissaat kaammattuutigaa.

- Ilisimassavaat innuttaasut peqqinnissaqarfik pisariaqartikkunikku nakorsiassapput soorunami taamak ingerlassaagut, taanna oqarpoq nangillunilu:

- Toqqissisimanngikkaanni soorunami nakorsiarnermi taanna oqaloqatigiissutigineqarsinnaavoq nakorsallu qanoq nammineq misigisimaneq aamma nakorsiarnermi soorunami nassuiaasarneq taanna ingerlasarpoq: - Uangaana qanoq misigisimasunga. Taannalu ingerlattassaaq.

Nakorsap nakorsiallu attaveqaqatigiinniarnerat ajornartorsiutigineqartaqisoq nakorsiallu pisariaqartitaminnik naammagittaallioraangamik tusaaneqanngitsutut misigisartut MIO-p sapaatit akunnerata siulianni oqaluttuaraa. Agathe Fontainili kingorna tassa taama oqarpoq.

Peqqinnissaqarfimmi pissutsit pitsanngoriaateqarsimanngitsut 

Agathe Fontain peqqissutsimut naalakkersuisutut sapaatit akunnerinnaa matuma siorna akisussaasunngorpoq, sulialli arfineq pingasut MIO-p saqqummiussai Peqqinnissaqarfimmi pissutsit pillugit aperiniarlugu saaffigaarput.

Taassumali peqqissutsimut naalakkersuisoqarfik aatsaat akisussaafiginngilaa, tassami tassani 2009-imiit 2013 tikillugu naalakkersuisutut issiareerpoq.

Taamaammat Peqqinnissaqarfimmi pissutsit ukiuni kingullerni qulini pitsanngorsimanerannik naliliisinnaassuseqarluarpoq, taassumalu naliliinera qiimmannanngilaq:

- Taamanili nakorsassaaleqineq, sulisussaaleqineq, ingerlavoq aamma ullumikkut nalunngilarput, Agathe Fontain oqarpoq.

Ajornartorsiutilli qanoq iliuuseqarfigilertortariaqartut, taanna erseqqissaavoq. Tassa assingisumik kukkusoqaqqinnginnissaa sumiginnaasoqaqqinnginnissaalu qularnaartariaqartoq, taanna oqarpoq:

- Kukkusoqartarsimanera kukkusoqartarnera taanna aamma miserratigineqarnikuunngilaq, taanna oqarpoq nangillunilu: 

- Ajuusaarutigeqaara. Nerioqaanga siunissami tamakkua pisassanngitsut, aamma oqareerpunga aallaqqaammulli angajoqqaannguit taakkua misiginneqatigeqaakka aammalu soorunami allatuulli neriuutigivara siunissami taamatut pisoqaqqissanngitsoq.

Qanoq pitsanngorsaaniarnerlutik akiuminaatsikkaa

Siunissami assingusumik kukkusoqaqqinnginnissaanik neriuuteqarneq naammannersoq piffissaannaap takutissinnaavaa. Agathe Fontainili tamatuma sulissutigilertornissaanut qanorlu iliuuseqarfigilertornissaanut piareersimavoq.

Peqqinnissaqarfimmili pissutsit qaqugu qanorlu pitsanngorsarneqassanersut aperigatsinni akiuminaatsippaa.

Peqqinnissaqarfiulli sulisussaaleqinera ajornartorsiutaasoq, taanna naalakkersuisuusimasut allat aamma erseqqissaatigisarsimasaattulli erseqqissaavoq:

- Unamminartumiilluta ilisimasuaannarparput, taanna nassuerutigineqareerpoq, oqaatigineqartuaannarpoq ukiuni kingullerni qanoq sulisussaaleqitigisugut, qinnuteqartitsiniaraangatta qinnuteqarneq ajortut, amigaateqartugut. Taanna inuiaqatigiit ilisimavaat aamma.