Arfinilinnik ukiullip Manuminap Dronning Ingridip napparsimmavissuani sulisunit passunneqarnrmini toqunerata kingorna pisut sapaatit akunneri kingulliit sammineqangaatsiarput.

Suliaritinnermini toqqusaamigut neqaajartippoq angajoqqaallu akuersiteqqaarnagit sorluata iluani naanerit nakorsamiit peerneqarput. Ullullu sisamat qaangiuttut toquvoq.

Manuminamut suliamut tunngatillugu peqqinnissaqarfiullu iliuuserisimasaanut tunngatillugu inuit aqqusinermi naapitatta qanoq isumaqarfigineraat KNR-imiit paasiniarparput.

Akissutit assigiinngeqaat, tamarmilli nunatsinni peqqinnissaqarfimmut pakatsisimaarput.

Henrik Falksen Assi © : Henriette Simonsen

Henrik Falksen:

Manuminamut tunngasoq atuarakku qanoq eqqarsarpit?

- Eqqarsaqaanga soorunami ukua angajoqqaajusunut tunngatillugu meeqqamik annaasaqarnerannik sullissisui taakkua nakorsaqarfimminngaanniit kusanarpallaanngitsumik iliorneri soorunami kipiluttunartorujussuuvoq. Eqqarsarnaqaaq assut. Ukua angajoqqaajusunnguit takorloorlugit sooq taamatut ikiorneqarsinnaanngillat imaluunniit akissutissaqarfigineqanngillat. Naalakkersuisulluunniit akissutissaqarumasimanngippata kusanaatsorujorujussuuvoq taanna.

Peqqinnissaqarfimmut isiginnittaatsit arlaatigut allanngorpa?

- Nakorsiarnissarluunniit pilerinarunnaaqqavoq uanga immineq eqqarsaatigissaguma, arlaatigut kukkussuteqartarneri taamatut amerligaluttuinnarput taamatut nakorsiaraluarlutik sumillu ikiorserneqassanatik. Manuminamut tunngasoq eqqarsaatigissagukku, ajoq nuanniitsorujorujussuuvoq tusagaq taamaattoq.

Qanoq eqqarsarpit peqqissutsimut naalakkersuisuusimasoq suli ulloq manna tikillugu apersorneqarusunngitsoq?

- Tupigisorujorujussuuara sooq taamatut akissuteqarsimannginnersut iluamik, tupinnaqaaq aamma inunnut ataasiakkaanulluunniit oqaaseqarsinnaasimannginnera, avaanngunartorujussuuvoq.

Aningaaq Esajassen Assi © : Henriette Simonsen

Aningaaq Esajassen:

Peqqinnissaqarfimmut isiginnittaatsit arlaatigut allanngorpa?

- Suu, tutsuiginarpiarunnaarpoq imatut tatiginarpianngereertigaluni namminermigooq suliaritileraluaruma ilaa taamatatut ulloq ataaseq marlulluunniit nakkutigineqartussaallunga tutsuiginarpianngilaq.

Qanoq eqqarsarpit peqqissutsimut naalakkersuisuusimasoq suli ulloq manna tikillugu apersorneqarusunngitsoq?

- Aappaatigut paasisinnaavara inuit ataasiakkaat pineqarmata taava kisianni soorlu arlaatigut oqaaseqartussaasimassagaluarpoq una sageq eqqartorneqarnerujussua pillugu soorlu napparsimmaveqarfiit peqqissaaviit tutsuiginarnerulissappata soorunami aamma naalakkersuisut arlaatigut iliuuseqartussaasariaqaraluarput.

Helga Lund Assi © : Henriette Simonsen

Helga Lund:

Manuminamut tunngasoq atuarakku qanoq eqqarsarpit?

- Tassa annilaarnaqaaq, qanorli nammineq taanna misigalugu aamma tusaannarlugu aqajannguummernaqaaq annilaarnaqaaq.

Peqqinnissaqarfimmut isiginnittaatsit arlaatigut allanngorpa?

- Soorunami tassami, meeqqanullu tamatsinnut aamma nakorsat taakku suliarinnissimasut aallarpaluunnarsimaneri ilaa tamarmik saqqummiisussaagaluarput utoqqatsertoqarlunilu taamaattoqaqqinnginniassammat, ulorianartutut isigileqqavara massakkut.

Qanoq eqqarsarpit peqqissutsimut naalakkersuisuusimasoq suli ulloq manna tikillugu apersorneqarusunngitsoq?

- Tupigerujussuarpara isumaqarpunga utoqqatsertariaqaraluartut taakku nakorsat taarserlugit tassami aallareersimammata taakkua suliarinnittut, taavalu naqissusiillutik annilaangassanngitsugut nakorsiartarfimmut imaluunniit nakorsaqarfinnut saaffiginninnissatsinnut.

- Massakkumut ersivugut ersigilerparput ilaa, nakorsiarnissarluunniit meeqqagulluunniit nakorsiunnissaat ersinarsivoq tujorminarpallaaqaaq. Utoqqatsertariaqaraluarput saqqummiullugulu pisussaaffeqarput taakkua akisussaaffeqarlutillu toqqissisimanartussaasoq.

Peqqissutsimut naalakkersuisuusimasoq, Mimi Karlsen (IA) naalakkersuisuunermini suliamut tunngatillugu apersorneqarusussimanngilaq.