Ruth Heilmann Folketingimi assilialiarineqartoq: Neriuppunga isumassarsititsisinnaassasoq

Assilialiortartoq, Mie Mørkeberg naalagaaffeqatigiinnermi ukiuni kingullerni 100-ni arnat tamat oqartussaaqataanerannut sunniuteqarsimasut 30-t pillugit ukiuni marlunni suliamik saqqummiussimmat qiimmattartoqangaatsiarlunilu ersaartaattoqarpoq.

Ruth Heilmann arnat assilialiarineqartut ilagaat. Taanna Qeqqata Kommuniani kommunalbestyrelsimi ilaatigut sulisimavoq, Maniitsumi borgmesteriunikuuvoq, Inatsisartunilu arnani siullersaalluni siulittaasuusimalluni.

Ruth Heilmannip qaaqquneqarnini akueralugu assiliap uleerneqarnissaanut ilaatigut Margrethe Vestager, Helle Thorning-Schmidt aamma Özlem Cekic isiginnaaqatigiartorlugit Københavniliarpoq.

Utaqqineq pissanganartoq

Politikerip soraarninngorsimasup, 79-inik ukiullip nammineq oqarnera naapertorlugu arnat ataqqiniarneqarlutik Christiansborgimi iikkami assiliaatigineqalertussatut toqqarneqartut ilaanniinnini pillugu Folketingimit ukiut marluk matuma siorna sianerfigitikkami tupaallassimanerarpoq.

- Tassunga qalipagarsuarmut tunngatillugu januaarimi 2022-miigunarpoq sianerfigineqaqqaarpunga, taamani aamma tupaqaanga, tassami isumaqarama allarpassuit arnat uanninngaanniit toqqagaanerusinnaagaluartut, taanna tupaallaatiginikuuara.

Mie Mørkebergip assiliamut titartaaqqaarpoq, Ruth Heilmannilu inuusukkallarami assiminik nassiusseqquneqarsimavoq. Assillu naammassinissaanut naammagittarluni utaqqinissaq tullinnguulluni.

- Pissanganarsimaqaaq, aamma ukiut taakku ingerlaneranni tusareerninnit tusagaqarneq ajorama. Taava qaammat ataaseq sioqqullugu allagarsivunga novembarip 12-ianni uleersiniartut qaaqquneqarlunga. Uanga oqarpunga tassa eksamenimiilluunniit pissanganarnerusoq taamatut utaqqerujoorluni uleerneqarnissaanut, illalaarluni oqarpoq.

Ruth Heilmannip panini Vivi ernuttanilu Ayla Københavnimut qaaqquai. Tamanna pitsorlunneranik aammali ilaquttaminit politikeriunermini tapersersuilluarsimasunut qujamasungaatsiarneranik pissuteqarpoq.

Qalipakkat ukiunik 100-nik nikingasut

Qalipagarsuaq Herman Vedelip angutinik 30-nik 1915-imi tunngaviusumik inatsimmut allannguinissamik suliaqartunik qalipagaliaata akiani nivinngarneqarpoq. Arnat 1915-imi taasisinnaalersinneqarput. Arnallu politikerit iikkami akianiittumik qalipaganngortillugit assiliartarineqalernissaannut ukiut 100-t ingerlaqqaarput.

Qalipagarsuaq Folketingimi inimi oqaloqatigiittarfimmi sapaatip akunnerata siuliani uleerneqarpoq. Assilialiornermik eqqumiitsuliortup, Mie Mørkebergip qalipakkani ukiuni marlungajanni suliaraa. Assi © : Mads Claus Rasmussen/Ritzau Scanpix

- Isumaqarpunga pitsaalluinnarlunilu pingaaruteqartoq. Politikkikkummi suliaqartut angutaannaanngillat, Ruth Heilmann oqarpoq.

Politikeriusimasoq tallini paarlangatillugit puiaasatut qorsummik qalipaateqartuni atisaqarpoq, kingornussaminillu tassa aatami nanuutaanik kukkiliseqarluni.

- Uleerneqarmat pakatsinngilanga, assera tassaqqissaajugami ulappuseruttorninni isikkora. Nuannaarutigersuaarpara taamani ulappuseruttornerma nalaanit assera nassiunnikuusara, kiinaq taanna aallaavigalugu suliarisimammagu, taanna oqarpoq.

Ruth Heilmannip eqqumiitsuliortumut Mie Mørkebergimut qujassutitut nunatsinnit ‘tammajuitsunnguamik’ tassa qulleerannguamik ukkusissamik tunissuteqarpoq. Ruth Heilmannilli oqarnera naapertorlugu qalipakkat marluk Inimi Oqaloqatigiittarfimmiilernerat naligiissitaanermut takussutissaavoq.

- Ukiorpassuarni arnat politikkikkut suliaqarsinnaannginneranni amigaataanikuuvoq. Neriuppunga qalipagaq arnat politikkikkut suliaqarnissaannut isumassarsititsisinnaassasoq.

Angutit politikerit akornanni arnartatuaasoq

Ruth Heilmann 1980-ikkunni politikeritut sulinermi aallartinnerani arnanik suleqatinik aamma takusassaqartarsimanngilaq.

- Siusinnerusukkut arnartatuaajuartarsimagama aamma anguterpaat akornanni. Sivisuumik tamanna pinikuuvoq, misigisarpassuupput anguterpaat akornanni arnartatuaaneq. (…) Qujanartumik kingusinnerusumi arlaqaleriartoramik arnat, taanna oqarpoq.

Ruth Heilmann politikeritut suliaqarnermini ilinniarfeqarfiit siammarterneqarnissaannut suliniuteqangaatsiarsimavoq, najugaqarfigisamimi ilinniarnissaq tunngaviusumik periarfissaassammat – aanna naak arnatut immaqa killeqarnerusut misiginarsinnaasaraluartoq.

- Aamma una pingaarami ilinniagaqarnissaq, siusinnerusukkut soorlu arnat meeraqaraangamik ilinniarnissamut periarfissaat annikitsuararsuusarmata, nunagisaq qimannagu ilinniarnissaq siunnersuutiginikuuara ilaatigut, taanna naggasiivoq.

Ruth Heilmannilu maanna oqaluttuarisaanermi danskit savalimmiormiullu arnat politikerit arlallit akornanni aamma qalipaganngortinneqarpoq.