Ruth Heilmann arnallu allat 29-t qalipakkanik nersorneqarput
København-imi Folketingimi inimi oqaloqatigiittarfimmi angutit 30-t 1915-imi tunngaviusumik inatsisissamik piareersaasut assilillugit qalipakkat nivingapput.
Taamani arnat qinersisinnaalerput qinigaasinnaanngorlutillu.
Maannakkulli angutit kisimik nivingajunnaarlutik, arnanik qalipakkanik ilalerneqassapput.
Tamanna pissaaq, arnat politikerit 30-t Danmark-imi demokratiimut sunniuteqarsimasutut akuerisaallutik inimi oqaloqatigiittarfimmi taakkunannga qalipakkat nivinngarneqarpataa.
Kikkut qalipanneqassanersut uani takusinnaavat:
* Arnat qalipanneqarlutik nersorniagassat 30-upput. Taakkua tamarmik assigiinngitsutigut malunnaateqarnikuupput.
* Atit nutaanerit ilagaat Margrethe Vestager, EU-mi kommissæriusoq kiisalu Helle Thorning-Schmidt, siornatigut Danmark.imi statsministeriunikuusoq.
* Kalaallit Nunaat Savalimmiullu aamma ilaatitaqarput, tassa Marita Petersen, lagmandi arnat siullersaat, kiisalu Ruth Heilmann, Inatsisartuni siulittaasut arnat siullersaat.
Nersornaasigassat atii tamaasa uani takusinnaavatit.
Najoqqutaq: Folketinget
Arnat nalunaarsukkat amerlaqaat, ilaatigut arnat Folketingimut qinikkat siulliit Elna Munch aamma Mathilde Hauschultz.
Arnalli Folketingimiissimasut kisimik qalipanneqassanngillat.
Politikerit marluk, Saalimmiuneersoq Kalaallit Nunaanneersorlu, naalagaaffeqatigiinnermi demokratiip inerisarneranut malunnaatilimmik sunniuteqarsimasut aamma ilaapput.
Taakkualu tassaapput nunatsinneersoq Ruth Heilmann, Inatsisartuni siulittaasut arnat siullersaat, kiisalu Marita Petersen, Savalimmiuni lagmandip arnat siullersaat.
AAMMA ATUARUK Nersornaat kuultiusoq Ruth Heilmannimut tunniunneqarpoq
Folketingimi siulittaasoq, Henrik Dam Kristensen, isumaqarpoq, Danmark-imi politikkikkut ukiut kingulliit 100-t ingerlaneranni arnat pikkorissut sunniuteqarsimasut nersorneqarnissaat piffissanngortoq.
- Qalipakkat nutaat atorlugit inimi oqaloqatigiittarfimmi (Samtaleværelset) angutit amerlanerussuteqarfianni arnat angutillu naligiinnerulissapput.
- Folketingip atuunnerani arnat immikkut sunniuteqarsimanerat uppernarsaaserniarlugillusooq qalipagaq siunissami takussutissaassaaq, Henrik Dam Kristensen tusagassiuutinut nalunaaruteqarpoq.
Ruth Heilmann sivisuumik politikeriunikuuvoq. Taanna aamma Maniitsumi borgmesteriunikuuvoq Inatsisartuniinnikuullunilu, ilaatigut inunnik isumaginninnermut aaqqissuusseqqinnissamut isumalioqatigiissitami siulitaasuunikuulluni.
2008-mi Jonathan Motzfeldt, kinguaassiuutitigut kanngutsaattuliorsimasutut pasineqarluni Inatsisartut siulittaasuattut tunuarmat, Ruth Heilmann-ip paarlappaa. Tassanilu issialluni – arnani siullersaalluni – 2009-mi juuni tikillugu.
Ruth Heilmann aamma naalakkersuisuusarnikuuvoq, siullermik 2002-mi ilinniartitaanermut kiisalu peqqinnissamut ilaqutariinnullu 2003-mi naalakkersuisuulluni.
