ASSIT Nersornaat kuultiusoq Ruth Heilmannimut tunniunneqarpoq
Ruth Heilmann, Inatsisartut siulittaasuannit Lars-Emil Johansenimit, Hans Egedep Illuani tallimanngormat apriilip ulluisa 29-anni nersornaaserneqarpoq, Ruth Heilmannip naalakkersuinermik ukiorpassuarni suliaqarsimaneranut nersorinnissutitut nersornaammik kuultiusumik nersornaaserneqarluni.
Ruth Heilmannip politikkikkut ukiut 20-t sinnerlugit sulisimanera pillugu Lars-Emil Johansen oqalugiarpoq:
- Inatsisartut Siulittaasoqarfiata kuultiusumik Nersornaaserpaatsit ukiorpassuarni naalakkersuinermik tunniusimallutit suliaqarsimanerit pillugu. Siullermik taamanikkut Maniitsup kommuniani kommunalberstyrelsimut 1989-imi qinigaaqqaarputit, Lars-Emil Johansen, Ruth Heilmannip nersornaaserneqarnerani ilaatigut taama oqarpoq.
Ruth Heilmann, Maniitsup Kommuniani 1997-imit 2001-ip tungaanut borgmesteriuvoq, Inatsisartunullu 1995-imi qinigaalluni, isumaginninnermik iluarsaaqqinnissamut ataatsimiititaliarsuarmi 1997-ip tungaanut siulittaasuulluni. Ruth Heilmann Inatsisartuni 2013-ip tungaanut ilaasortaavoq, Inatsisartunut 2008-mit 2009-p tungaanut siulittaasuulluni. Naalakkersuisunut aamma ilaasortaasarsimavoq, ilinniartitaanermut naalakkersuisutut 2002-mi inissisimalluni, peqqissutsimullu ilaqutariinnermullu kingorna 2003-mit aamma naalakkersuisuulluni.
- Naalakkersuinikkut suliaqarsimanippit annertuumik suliaqarsimanerit tunniusimanerillu takutippaat, Lars-Emil Johansen oqarpoq.
