Ruth Heilmann eqqarsariarpoq: "Sooq uanga qalipakkatut?"

Arnat allat 29-t peqatigalugit Ruth Heilmann Folketingemi inimi oqaloqatigiittarfiup iigaani nivingasussami qalipanneqangajalerpoq.

- Tupaallappunga soorunami, sooq uanga? eqqarsarpunga, Inatsisartuni arnani siullersaalluni siulittaasuusimasoq KNR-mut oqarpoq.

Qalipanneqarnissaa pillugu nutaarsiassamik KNR inuttaanut ataasinngormat tusarliisuuvoq. Ullormi taanna Ruthip naluaa qalipanneqartussanngornini. Folketingimi aalajangerpoq, 1915-miit demokratiip sorsuutigineqalerneraniit demokratii pillugu arnat 30-t sorsuuteqarsimasut qalipanneqassasut.

Taakkunanngalu Ruth Heilmann kisiartaalluni kalaalersaavoq, taakkunannga ataaseq Savalimmiuneersuuvoq tassaasoq - Marita Petersen, taannattaaq Savalimmiuni arnani siullersaalluni lagmandiusimavoq.

Arnat allat pikkorissut eqqaagai

- Arnarpassuit allat pikkorissut eqqaavakka, taakkumi aamma nunatta Danmarkillu akornanni naalagaaffeqatigiinnermut sunniuteqarsimapput, taakku ilaasa poltikkikkut sunniuteqarsimanera maluginiarsimassavaa, Ruth Heilmann oqarpoq.

Taassuma taama pineqarnini naalagaaffeqatigiinnermut sunniuteqarsimanerminik qujaniarnertut paasigini oqaatigaa.

AAMMA ATUARUK Ruth Heilmann arnallu allat 29-t qalipakkanik nersorneqarput

- Ilaquttakka sarsuatilerpakka, uiga erninnguarigaluaralu, taamatullu aamma Siumumi sinniisuuffigisimasara Hans Pavia Rosing eqqaavara. Qujavungalu Folketingimi qalipaarusullutik aalajangersimammata, torrallataasoraara arnat marluk nunatsinneersoq Savalimmiuneersorlu qalipanneqartussanngorneri, tamanna suleqatigiilluarnerup anersaavanik imaqarpoq qujassutissaavorlu, oqarpoq.

Qalipaasussaq unammisitsinikkut nassaarineqassaaq

Ruth Heilmann arnani siullersaalluni Inatsisartuni siulittaasuuvoq, politikkikkullu angusarissaarsimaqaluni, Maniitsumi borgmesteriusimavoq, taamalu Inatsisartuni ilaasortaasimaqaluni ilaatigut Inunnik isumaginninnermut tunngasut pillugit aaqqissuusseqqittoqarmat ataatsimiititaliarsuarmi siulittaasuusimavoq.

Jonathan Motzfeldt, kinguaassiuutitigut kannguttaatsuliorsimasutut pasineqarluni Inatsisartut siulittaasuattut 2008-mi tunuarmat, Ruth Heilmannip paarlappaa. Tassanilu issialluni – arnani siullersaalluni – 2009-mi juuni tikillugu.

Ruth Heilmann aamma naalakkersuisuusarnikuuvoq, siullermik 2002-mi ilinniartitaanermut kiisalu peqqinnissamut ilaqutariinnullu 2003-mi naalakkersuisuulluni.

Qalipagaq Folketingemi inimi oqaloqatigiittarfimmi nivingatinneqassaaq, inilu taanna atorneqartarpoq soorlu avataaniit tikittut inuit politikkikkut pingaarutillit oqaloqatigineqarnerini. Inimilu tassani inuit oqaluttuarisaanermi sunniuteqarnerpaasimasut qalipanneqarsimaneri nivingatinneqarput.  

Kialli Ruth Heilmann qalipassaneraa suli aalajangertoqanngilaq. Alloriarnerlu tulliussaaq eqqumiitsuliornermut tunngatillugu aalajangiisartut unammisitsinermut siunnersuuteqarnissaat, taakkulu qalipakkaminnik siunnersuutiminnik takutitsissapput toqqarneqassallutillu.