Neriuffiup aningaasat ima atorniarpai

Nappaassuaq kræfti akiorniarlugu suliniarnermut Neriuffik arfininngormat katersuiniarami, 2.525.246 koruuninik isertitsivoq. Taakkua ukioq kingulleq katersukkanit 40.000 koruunit missaannik amerlanerupput.

Allattoq Malu Pedersen

marsip 09-at 2015 14:56

Aningaasat isertinneqartut assigiinngitsunut atorneqassasut Neriuffiup siulittaasuata oqaatigaa.

- Siullerpaajuvoq, inisseqqalluni, siunnersuisarfissamik sulissuteqarniarnerput taannalu napparsimmaviup eqqaani inissinneqarsinnaappat qujanarnerpaajussooq, Neriuffiup siulittaasua Sara J. Brandt taama oqarpoq.

Aamma atuaruk Neriuffik katersuiniarnermini rekordiliivoq

Kræftimik nappaateqalersimasut toqqaannarnerusumik attaveqaqatigiinnissaannik Neriuffik sulissuteqarniarpoq.

Taamaammat kræftimik nappaateqalersimasut oqarasuaatikkut saaffiginnittarfissaannik pilersitsiniarput.

Aningaasat arfininngormat isertinneqartut sumut atorneqassanersut Neriuffimmi siulersuisut ippassaq sapaammi pilersaarusiorpaat.

Qaammarsaaneq

Aningaasallu isertinneqartut pinaveersaartitsinermut atorneqassapput.

- Siunertatsinniikkami aamma qaammarsaanermik peqassasugut taannalu ingerlapparput atuagaaqqatigut assigiinngitsutigut kalaallisut allaqqasunik, maannamut 29-nik peqareerpugut, kisianni taakkua aamma saqqummilaartinnerunissaat aammalu immikkoortortaqarfinnut tapersiilluta immikkoortortaqarfiit uummaarinnerulernissaat sulissutigaarput. Qaammarsaaneq aqqutigalugu tamakkua aamma ingerlatissuagut.

Naak aningaasat 2,5 millionit koruunit amerlagaluartut, Neriuffiup pilersaarutaasa tamarmik piviusunngortinnissaanut naammanngitsut, Sara J. Brandtip oqatigaa.

Neriuffik Realdania suleqatigalugu pilersaarutit ilaat piviusunngortinniarlugit sulissuteqarniarlutik nalunaarput.

Aappaagu katersuiniartoqaqqissasoq Neriuffiup pilersaarutigaa.