Neqi A/S angusaqarluartoq
Silap atoruminarnera panerneralu tunisat amerlanerunerannik nassataqarpoq.
Naatsiianik pingaartumik naatitsilluarnerusoqarpoq. Naatsiiat 105 tonsit tunineqarput. Tamanna ukiup siulianut sanilliullugu 54 procentimik qaffariarneruvoq.
- Aasaq silap panernera atoruminarneralu qujassuteqarfigisinnaavarput, Neqi A/S allappoq.
Naatsiianillu tunisaqarnerusoqaannanngilaq, naatsiiat pitsaassusaat aamma qaffasinnerupput.
AAMMA ATUARUK Vellykket høst: Dobbelt så mange kartofler i år
- Naatsiiat Neqi A/S-imut tunineqartut passunneqartarneri aamma pitsanngoriartinneqarpoq, tassa isugutakkunnaartereerlugit aatsaat poortorneqartalermata, taamaalilluni oqunnissaralui pinngitsoortinneqarlutik. Neqi A/S-imut tunineqareeraagata ulluni 14-ini panerseqqaarneqartarput poortorlugit nassiussuunneqalinnginnerini. Tamatuma saniatigut naatsiiat pitsaassusiisa misissornerini aamma kasiilikkat ikinnerujussuusimapput. Pisisartut qilanaariinnarsinnaavaat naatsiiat nunatsinneersut pitsassuit mamarnerusut pisiniarfinni pisiarinissaat, Neqi A/S tusagassiuutinut nalunaarummi allappoq.
Neqinik tunisineq aamma ingerlalluarpoq.
Assersuutigalugu savaaqqat tuneqartut 19.396-iupput. Tassa ukiup siulianut sanilliullugu 1.376-inik amerlanerupput. Savalli ukioq manna tunisat toqutallu amerlanerugaluartut agguaqatigiisillugu oqimaassusaat ukiup siulianut sanilliullugit appasinnerulaarpoq. Tamanna aasaq silap panerneruneranik pissuteqarpoq, Neqi A/S allappoq.
AAMMA ATUARUK Savatillit savaasivittaarusupput
Aammattaaq ukioq manna tuttuttoqarneruvoq – tuttut 159-it Neqi A/S-imut tunineqarput. Tuttut tunineqartut 100-ngajannik amerlanerupput, siorna tunisat 62-iummata.
- Tamatumunnga pissutaavoq Narsap eqqaani tuttuuteqarfimmi piffissaq sivisunerusoq atorlugu katersisoqarsimanera. Taamaalilluni tuttut amerlanerusut Neqi A/S-imeersut pisiniarfiit qerititsiviini siumorneqarsinnaalernissapput, Neqi A/S allappoq.
