Naatsiiat marloriaammik amerlanerusut tunineqartut
Ukioq mannami tunisat ukiup siulianut sanilliullugit marloriaammik oqimaassuseqarlutik 100 tons sinneqartut Neqi A/S-imut tunineqarsimapput.
Tunisilluartut ilagaat Eqaluit iluarmioq Ferdinand Egede.
- Tassa uagut ajorinngilarput, naatsiianik naatitsisartoq Ferdinand Egede oqarpoq.
Eqaluit iluarmiut narsaatiminni uani ukioq manna naatsiiat naatitaat siornamut sanilliullugit aamma marloriaammik amerlanerullutik 64 tonsinik oqimaassuseqarput.
Imerterilluartarneq kinguneqarluartoq
Aasaq sialoqarpiassanani kiakkaluaqisoq, Ferdinand Egedekkut naatsiianik naatitsivigisartakkaminni narsaatini imerterilluartarsimagamik ukioq manna naatitsilluarsimanerminnut tamanna pissutaasoraa.
- Tassani imerterilluartarnerput iluaqutigaarput. Imerterut ingerlatiinnaavillugu nooqattaartiinnavillugu. Taamaalilluta naatsiiaanik pissarsiagut naammagisimaarpagut, Ferdinand Egede oqarpoq
Siorna pissutsit allarluinnaasimapput
Siorna ukioq mannamut sanilliullugu siallernerujussuuvoq.
- Siorna siallerpallaarneratigut ilarparujussui iluatsinngitsooramik. Taava aasaq manna maani qanittumi panernerusumi ikkussuigatta.
Ukioq mannalu naatsiiat naatitat siornatigornit allaanerunerat aamma maluginiarneqarpoq.
- Naatsiiat ikkussukkagut ukiut siuliinit allaanerugamik. Kangeqartorujussuupput immaqa aasaq manna kiannermik. Siaaraangamik inummilluunniit portunerusarput ilaatigut. Tassa kangeqarpallaarneri taakua kisimik ajornartorsiutaapput piiaaniarneq pisarnermiit arriinnerugami.