Naalakkersuisut pisassiissutit pillugit isornartorsiuineq akuerinngikkaat: Neqeroortitsisimaneq atorunnaarsinneqassanngilaq

Naalakkersuisut ingerlatseqatigiiffiit marluk qaleralinnik, saarullinnik nataarnanillu neqeroorusiortitseqqittoqarnissaanik piumasaqartut isornartorsiuinerat akuerinngilaat. Neqeroorusiortitsineq atorunnaarsinneqassanngilaq.

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik KNR-imut allappoq, taannalu aalisarnermut naalakkersuisumit Peter Borgimit atsiorneqarpoq.

Inua Fisheriesimit Halibut Greenlandimiillu isornartorsiuisoqarpoq, taakkulu naalakkersuisut piumasaqaatit aallaavigalugit aalajangiisimannginnerarpaat. 

Naalakkersuisulli qinnuteqartut tamarmik pointilersueriaaseq neqerooruteqartitsinermi allaqqasoq malillugu nalilersorneqarsimanerat oqaatigaat. 

Pisassiissutigineqartup aappaanut qinnuteqartuni arfineq pingasuusuni arfinillit piumasaqaatit malissimavaat pointilersueriaatsimullu illuinnaasiortuunngitsumut tulleriiaarneqarlutik. 

Pointilersueriaaserli kisiat aalajangiinermi aallaavigineqanngilaq. 

Suliniutit arlallit piukkunnarsimagaluartut

Naalakkersuisut suliniutit arlallit piukkunnarsimanerarpaat. 

Taamaattumik naalakkersuisut qinnuteqartut ataatsimut naliliiffigisimavaat. 

- Suliniutit arlallit piukkunnarmata, naalakkersuisut qinnuteqartut ataasiakkaat naleqarnerat eqqarsaatigaat suliniutinilu akuerineqarsinnaasut akuerineqarsinnaanngitsulluunniit naliliiffigineqarlutik, naalakkersuisoqarfik allappoq.   

Tassani aalisartunngorlaat avataasiortutut aallartisarsinnaanissaat aamma eqqarsaatigineqarpoq. 

Qinnuteqartut ineriartortitsinialersaarnerat ineriartortitsiniarnerisalu sunniutigisinnaasaat naliliinermi aamma pingaaruteqarsimapput. 

Aalajangiinermilu taannarpiaq, Inua Fisheriesimit Halibut Greenlandimiillu apeqquserneqarpoq, tassa qinnuteqartunut naliliinermi tunngavissat ersarissumik tunngavigineqartussatut ersarissumik allassimanersut. 

Inua Fisheriesip naalakkersuisut pointilersueriaatsimik naliliinermit inaarutaasumik aalajangiisimanerat ilaatigut apeqquserpaa. 

‘Neqerooruteqartitsisimaneq atorunnaarsinneqassanngilaq’

Naalakkersuisulli aalisagartassiissutissiiniarnerminni malittarisassanik unioqqutitsisimannginnerarput.  

Naalakkersuisut aalisarnermut inatsit, IOK-mit nalunaarutit akissutiminni innersuussissutigaat.

Naalakkersuisut kikkut avataani aalisarnermik ingerlatsilersinnaanerannik taamaalillutillu aalisagartassiissutinnassinnaanerannik aalajangiisussaatitaanerat tassani allassimavoq.

Naalakkersuisullu aallaqqaataaneernissartik pilersaarutiginngilaat. 

- Neqerooruteqartitsineq neqerooruteqartitsinermi piumasaqaatinut aalisarnemullu inatsimmut naapertuummat atorunnaarsinneqarnavianngilaq, naalakkersuisoqarfik allappoq. 

Akuersissutit aalisagartassiissutinnattunut allagartalerneqareerput taakkualu aalisalereerput, naalakkersuisut paasissutissiipput. 

Naalakkersuisoqarfiup piumasaqaatit periuserlu atorneqartoq neqerooruteqartitsinermut tunngatillugu paasissutissani aalajangernerlu pillugu allakkani, qinnuteqartunut tamanut nassiunneqartuni, takuneqarsinnaanerat  tamanna ilutigalugu erseqqissaatigaa.

Inua Fisheriesip Halibut Greenlandillu akerliliinerinut akissutinik ingerlatseqatigiiffiit allakkatigut toqqaannartumik nassinneqassasut, naalakkersuisoqarfik allappoq. 

Taamaalillutik naalakkersuisut akissutigigallagaat erseqqippoq: Nutaamik neqeroortitsisoqaqqinnavianngilaq, SiKu Trawlimut Qeqertalik Seafoodimullu aalisagartassiissutinnannissaannut tunngatillugu aalajangiinerit pinngitsooratik atuutissapput.

Akerleriissut naalakkersuisut neqeroortitsinermi piumasaqaatit allassimasut saniatigut allanik piumasaqaateqaqqusaasimanerannut maanna tunngassuteqarpoq. 

Halibut Greenland septembarip arfineq aappaanni saaffiginnissutertik Naalakkersuisoqarfimmiit suli akineqarsimanngitsoq, KNR-imut allapput. Taamaattumik suliaq pillugu oqaaseqarusunngikkallarput.