Arsaanneq: Nemo Thomsen Kolding IF-mut isumaqatigiissusiorpoq

19-nik ukiulik Nemo Thomsen Ilulissaneersoq silami arsaannermi inersimasunut ilannguppoq. 1. divisionimut qaffarlaat Kolding IF kalaallimut arsaattartumut tassunga isumaqatigiissusiorput.

Allattoq Noah Mølgaard

juunip 26-at 2023 14:34

Arsaaffimmi taassumalu avataani malartitassaanngitsumik akiuukkusussuseq sakkugalugu Nemo Thomsen qallunaat arsaattarneranni qaffasissumut killippoq.

Danmarkimi arsaannermi kakkannerit tulliinut qaffarlaat Kolding IF sapaammi nalunaarput maanna Nemo Thomsen isumaqatigiissut tunngavigalugu arsaattartorilerlugu.

Taanna Ilulissaniit 15-iinnarnik ukioqarluni aallarpoq qaffasissumik arsaattalernissamik anguniagaqarluni. Sønderjyske aallartiffigereerlugu ukiut marluk matuma siorna Kolding IF nuuffigaa.

- Kolding IF-mut nuunnera assorsua iluaqutigivara tassanilu sungiusaasoqarpunga uannut upperinnittunik, Nemo Thomsen KNR-mut oqarpoq.

- Aqqutaa sivisuvoq. Maannali inersimasuni arsaattarnermut ikaarsaartussanngorpunga peqatigiiffimmi toqqissisimaffigisanni, Nemo Thomsen oqarpoq.

Assoralinissamut sapiutinngilaq

Ukiumi unammiffiusumi Kolding IFip U-19-ni unammisartuini ingerlalluarpoq Danmarkimi pissartanngoramik. Iligiinni Nemo Thomsen isertitsinersaavoq katillugit 25-nik isertitsilluni.

Aamma atuaruk Island Games: Arsaannermi unamminissat sioqqullugit kalaallit kakkalluartunut unammissapput

Angusaqarnissamulli aqqut oqittuinnaasimanngilaq.

- Taamani Ilulissaniit aallarama aalajangernikuuvunga qanorluunniit pisoqaraluarpat tunniutiinnarniarnanga, Nemo Thomsen oqaluttuarpoq.

- Aqqutaa aamma sakkortusimavoq, imminulli oqarfigiuaannarpunga tunniutiinnarniarnanga sinnattoralu anguniartuaannarumallugu. Isumaqarpunga aamma sinnattoq piviusunngortinniaraanni sukataartoqartariaqartoq misigisimavungalu taamaasiorsimallunga, Nemo Thomsen oqarpoq.

Aamma atuarukAajuku Island Gamesimi arsaannermi Nunatta unammisitassai

Maanna Kolding IFip 1. divisionimi aamma NordicBet ligamik taaneqartartuni unammisartuiniilerpoq. Sungiusaasullu qullersaat Kristoffer Wichmann piareersimavoq Nemo Thomsenip inersimasunut ikaarsaarnissaani ikiuunnissamut.

- Peqatigiiffimmi tamatta Nemo alloriaqqinnissaani ikiorusupparput, Nemo upperaarput – maannalu Nemop takutinniartussanngorpaa suli siuariaqqissinnaallunni. Uagut peqatigiiffitsinni tamatuma iluatsinnissaanut pisinnaasarput tamaat ikiuutissaagut, Kristoffer Wichmann Nemo Thomsenimut isumaqatigiissusiornermut atatillugu oqarpoq.