Island Games: Arsaannermi unamminissat sioqqullugit kalaallit kakkalluartunut unammissapput

Nykjøbing Sjællandimi arsaannermi kalaallit nunanut allanut unammisartut B93 julip tallimaani unammissavaat.

Unammineq taanna pissaaq aasamut julip arfineq pingajuaniit Island Gamesimi unammiffissamut Guernseymut aallarnissamut aqaguppat.

Kalaallit nuna tamakkerlugu sungiusaasuat Morten Rutkjær B93-mi unammisartuunikuuvoq maannalu aperisimavai kalaallit nunanut allanut unammisartuinut unammerusunnersut.

- Kalaallit nunanut allanut unammisartui maannakkorpiaq Danmarkimi nuannarisaasupilussuupput. Kalaallit eqqumaffigineqartorujussuupput. Taamammat saaffigisavut erngerlutik akuersipput, Morten Rutkjær KNR-mut oqarpoq.

Island Gamesimi kalaallit puljeqatigaat Bermuda, Orkney aamma norskit qeqertaat Froya. B93-mut unammineq Island Games sioqqutilaarlugu misiliinnissamut iluatinnaateqarpoq.

- Unammisassavut uagutsinniit kakkannerupput, Morten Rutkjær oqarpoq.

- Nalaatsornerinnaanngitsumik kakkattunik toqqaavunga. Unammisartuutivut immikkoortumi ataatsimi tamarmik unammeqataajumaarput. Sungiusimasaannit sukkanerusumik arsaattoqarumaarpoq. Tamannalu pissutigalugu Island Gamesimi unammisassavut B93-tut kakkatsigissanngillat taamalu arsartuvut Island Gamesimut piareerluarsimassallutik, Morten Rutkjær naliliivoq.

Sungiusaasooqatigiit Island Gamesimi unammisassat pillugit paasissutissanik katersereerput.

- Iligiit nukittuut pingasut unammissavavut, taamaattorli periarfissaqarsinnaanissamut ilimagivara, Morten Rutkjær naggasiivoq.