NemKontotaarnissamut qaammatit marluk suli periarfissaasut

Pisortat aningaasanik nuussiffigisartagassaannik NemKontotaareerfissaq ullulerneqarpoq.

Allattoq Hanna Vestergaard Hviid

juunip 02-at 2023 15:42

Kikkulluunniit pisortanit aningaasanik nuussiffigitissinnaajumallutik NemKontotaartariaqartut, Digitalimik Sullissinermut Aqutsisoqarfiup nalunaarutigisareerpaa. Soorlu pisortani sulisunut akissarsiat, ilinniagarnermusiat ikiorsiissutilluunniit ilaatigut pineqarput.

NemKontotaareerfissarlu ullulerneqarpoq. Tassa aggustip aqqaneq-aappaajutinnagu NemKontotaarsimanngitsut pisortanit aningaasanik nuussiffigineqarsinnaanavianngillat.

Naalakkersuisut Siulittaasuata Naalakkersuisoqarfia tusagassiorfinnut taama nalunaarpoq.

NemKonto tassaavoq, aningaaserivimmi konto pisortat aningaasanik nuussisarfissaat. NemKonto konto nalinginnaasuuvoq, kontoreriikkanilu sorleq NemKontonngortissanerlugu nammineq aalajangigassaavoq.

Qanoq NemKontotaassaanga?

Netbaneqarpit MitID-qarlutillu? Taava MitID atorlugu NemKontoqarnerlutit takusinnaavat – minutsit marluk taamaallaat atussavatit

Aningaaserivinnukarsinnaavit? Taava kinaassutsimut uppernarsaatit nassarlugu siunnersortit peqatigalugu NemKontotaarit

Illoqarfiit/nunaqarfiit innuttaasunut kiffartuussiveqarpa immaqaluunniit innuttaasunut kiffartuussivimmit aallartitaqarpa? Kinaassutsimut uppernarsaat nassarlugu innuttaasunut kiffartuussivimmukarit, innuttaasunuut kiffartuussivimmit ikiorneqarlutit NemKontutaarsinnaavutit

Kinaassutsimut uppernarsaateqanngilatit? (passi immaqaluunniit biilersinnaanermut uppernarsaat) Taava ilinnut akisussaasup atsiorneranik najugaqarnermullu uppernarsaammik nassarlutit innuttaasunut kiffartuussivimmukarit – immaqaluunniit inunnik marlunnik kinaassutsinnut uppernarsaasinnaasunik, kinaassutsimut uppernarsaatilinnik nassarsinnaavutit

MitID atorlugu nemkonto.gl-imut iserit

NemKontotut atorniakkat kontonormu allaguk
Allakkatigut allakkamik atuutilersitsissutissannik nassinneqassaatit (sapaatip-akunneri pingasut missaat qaangiukkaangata tikittarpoq)
Atuutilersitsinissamut sianerfissaq aqqutigalugu NemKonto atuutilersinneqassaaq

Najoqqutaq: Naalakkersuisut.

Tassa aggustip aqqaneq-aappaajutinnagu NemKontotaassanerlutit illit nammineq aalajangissavat.

Aamma atuarukNemKonto aasap kingorna atuutilissaaq: Inuit ilai aningaasarsinngitsuussapput

Inuit NemKontotaareerfissaq nallertinnagu Nemkontotaarsimanngitsut pisortanit aningaasanik nuussifigineqarsinnaanngitsortaqarnissaat ilimagigini, Digitalimik Sullissinermut Aqutsisoqarfiup pisortaa Katrine Hjelholt Nathanielsen marlunngormat oqaloqatigigatsigu oqarpoq.

- Taava aningaasanik pisinnaanavianngillat. Taamaammanuna inuit nemkontotaarnissamut nalunaarsupallannissaat pillugu siammasissumik nalunaarutiginiarsarigipput, tassami nalunaarsunngikkunik aningaasanik tigusisinnaanavianngimmata, Katrine Hjelholt Nathanielsen oqarpoq.

Taassumali oqarnera naapertorlugu kingusinaarluni NemKontotaarsimagaanni aningaasarsiat annaaneqarsinnaanngillat NemKontotaareernermilu tiguneqarsinnaassallutik.