Ikuallattut qaminneqarput
Qaasuitsup Kommuniani Qatserisartut 16-it Qeqertaasami ikuallattoq siaruatsaalereerlugu arfininngornermi illoqarfigisaminnut utertut KNR-imi oqaluttuaraarput.
Ikuallaffiusup iluani suli aamaartoqarsinnaavoq issup issussuuffiani, qatserisartut pisortaat Bjarne Gregersen KNR-imut taama allappoq.
AAMMA ATUARUK Nassuttuumi ikuallanneq annikillineqartoq
KNR-imi tallimanngornermi oqaluttuaraarput Qaasuitsumi qatserisartut 16-it, Nassuttuumi Qeqertaasami ikuallattup siaruatsaalineqarnerata kingorna illoqarfigisaminnut utersimasut.
AAMMA ATUARUK Nassuttuumi ikuallannerup aavarnissaq akornuseraa
AAMMA ATUARUK Nunami ikuallanerit arlaqarput
Kangerlussuatsiami Illut Nuuanni ikuallanneq aggustip arfernani takuneqarluni nalunaarutigineqartoq, siallernerata kingorna qamissimagunartoq, Qeqqata Kommuniani Upalungaarsimanermut Pisortap tullia Morten Siegstad oqarpoq.
Qeqqata Kommuniata Maniitsumi Upalungaarsimanermut immikkoortortaqarfiata Kangaamiuni aalisartut attavigisarpaat taakkualu nalunaarutigaat Kangerlussuatsiami Illut Nuuanni ikuallattoq qamissimasoq.
- Timmisartuutileqatigiiffiup Air Greenlandip timmisartuini aquttut attavigilluarpagut, taakkua ikuallattumit assilisanik nassittarpaatigut, taakkualu nassiussaat aallaavigalugit ikuallattoq qatserneqassanersoq nalilersortarlutigu, maannali siallernerata kingorna ullunilu tullerni siallertussaanera pillugu ikuallattup qamissimanissaa naatsorsuutigaarput, Morten Siegstad oqarpoq.
Kangerlussuatsiami ikuallattup pujua annertooq Kangaamiunut anngummat Kangaamiuni innutaasut arlaqartut KNR-imut sapaatip akunnerani kingullermi saaffiginnittarput, ikuallattoq qaminniarlugu pisortanit iliuuseqartoqassanersoq apeqqutigisarlugu.
Upalungaarsimanermut pisortap tulliata Morten Siegstadip innutaasunut maanna kaammattuutigaa nunami ikuallattumik takusaqarunik assileriarlugu Qeqqata kommuniani Qatserisartunut nassiuttassagaat.
Nassuttuumi ikuallattoq suli qatsertariaqassanersoq takuniarlugu sapaatip akunnerata ingerlanerani alakkarneqassaaq. Ikuallattoq annertuseqqissimappat, qatserisartut qatseriartortinneqassapput, Qaasuitsup Kommuniani Qatserisartut pisortaat, Bjarne Gregersen oqarpoq.
