Nattoralik umiarsualivimmi apornermi kingorna niaqorlulaaginnartoq

Nattoralik Nuummi kranimut ataasinngornermi ullaap tungaani apornermi sigguni annersippaa, kingornalu tingisinnaanani.

Nattorallilli ajutoornera qujanartumik arlalinnit takuneqarpoq – takunnittullu Nuummi uumasut nakorsaat Donnas Dyreklinik attavigipallappaat.

- Donnas Dyreklinikimi nalinginnaasumik taama iliorpallaarneq ajoraluarpugut, kisianni qimminik nakkutilliisuugama uumasunillu ajoqusersimasunik nalinginnaasumik suliaqartarlunga nattoralimmik aalleqataavunga, Tom Amtoft oqarpoq.

Taanna Donnas Dyreklinikimi uumasut nakorsiartarfianni akisussaasuullunilu Nuummi qimminik nakkutilliisuuvoq.

Taannali ajutoorfiusumut ingerlarianngilaq. Angutimmi marluk nattoralik pisareriarlugu ulillugu aggiuppaat.

- Ulissisimasinnaanerisa nattorallip qanoq sanngiitsiginera takutippaa, taamaammat iliuuseqartariaqarpugut, Tom Amtoft oqarpoq.

- Uumasut nujuartat imaluunniit nujuitsut pineqaraluarpataluunniit naalliuttussaanngillat, taamaammat tassani susoqarsimanera piffissami tassani ilisimanngilarput.

Niaqquni siggunilu annersissimagai

Uumasut nakorsiartarfiata uumasunut nakorsaqarfik inuussutissalerinermullu oqartussaaffik attavigipallappaa, uumasormi nujuartaq immaqa aallaaneqarsimasoq pineqarpoq. Nattoralilli nammineq kranimut aporsimasoq kingornatigut paasinarsivoq, uumasullu misissorneqarnerani ajutoornera niaquaniinnerusoq paasineqarluni.

- Sajuppillatsitsimasoq paasinarsivoq. Niaqquni annersissimavaa, tamannalu pissutigalugu umiarsualivimmit tingeqqissinnaasimanani, Tom Amtoft oqarpoq.

Nattorallip sajuppillatsitsinermi saniatigut siggumigut aappoq, tamannali nammineq uneqqippoq, timmiaq uummaarisseqqipallappoq, anerusunnerminillu ersarissumik takussutissiilluni. Taamaammat Tom Amtoftip suleqataatalu nattoralik uumasunik angallassissummiitsillugu Ukkusissamukaappaat.

- Uumasunut angallassissummit eqqissilluni anillappoq, sulunilu siaariarlugit tingilluni. Takoqqinngilarput, taamaammat nuannersumik inerneqarpoq.

- Angallassissummit anillakkami tingivoq, soorlu allamik iliuuseqarnikuunngisaannartoq, Tom Amtoft oqarpoq.

Uumasut nakorsaanniittoq qaqutigoortoq

Uumasut nakorsiartarfianni akisussaasup uumasumik ikiorneqartariaqartumik ikiuisimanini aammali nammineq suleqatinilu uumasumik taama qaqutigoortigisumik uumasut nakorsaanniittartumik suliaqarsimanertik tulluusimaarutigaa. Taassumalu nattoralimmik ikiortariaqartumik ikiuisinnaaqqinnissani nipaatsumik neriuutigaa.

- Soorunami uumasumik ajoqusertoqarnissaa neriuutiginngilara, kisianni taama pisoqaqqissagaluarpat inunnit attavigineqaqqinnissarput neriuutigaara, taanna oqarpoq.

Utaqqingaatsialaassagunarporli. Uumasummi nakorsiartarfiat ukiuni qulini aatsaat aappassaanik nattoralimmik ikiugaqarpoq.