NATO-mut ilaasortaq Polen rakettimik eqqorneqartoq
Polenip Ukrainemut killeqarfianit 6 kilometeritut ungasitsigisumi illoqarfeeraq Przewodow rakettimik marlunngornermi unnukkut eqqorneqarmat inuit marluk toqutaapput. Polenimi oqartussat taama nalunaaruteqarput.
Polen, nunat killiit illersoqatigiiffianni NATO-mi ilaasortaavoq, nunalu NATO-miittoq saassunneqaraangami NATO-p pilersinneqarnerani aalajangersakkami immikkoortut tallimaat, artikel 5, taamaalinerani atuutilersinneqartarpoq, nunat NATO-mi ilaasortat sinneri qisuariaateqartarlutik.
Kikkut rakettimik igeriussisuunersut suli ilisimaneqanngilaq. Ruslandili rakettimik igeriussisuusoq, Ukrainemi oqartussat marlunngornermi unnukkut oqaatigaat.
Ruslandip illersornissamut ministereqarfiata tamanna akuersaarumanngilaa. Ruslandimi nutaarsiassaqartitsivik Interfax taama allattoq, nutaarsiassaqartitsiviup Reutersip aamma allaaseraa:
- Ukrainep Polenillu killeqarfiata nalaanut Ruslandimit saassussisoqanngilaq, Ruslandip illersornissamut ministereqarfia taama allappoq.
AAMMA ATUARUK Lavrov: Ukrainemiut oqaloqatigiikkumanngilluinnarlutillu piumasaqaataat piviusorsiunngillat
Nunat suliffissuaqarfiusut annerit 20-t, tassa G20-t, naalakkersuinikkut siuttuisa Balimi ataatsimeersuareernerisa nalaanni Polenip rakettimik igeriussiffigineqarsimaneranik nutaarsiassaq takkuppoq.
Rakettimik igeriussisoqarsimanera pillugu nutaarsiassaq saqqummiunneqareersorlu, USA-p præsidentia Joe Biden, siuttut allat kingorna ataatsimeeqatiserivai, raketterlu Ruslandimeersuusimannginneranik takussutissaqarunartoq tassani oqaatigalugu.
- Misissorluaqqaareerlugu aatsaat taama oqarusuppunga, rakettilli ingerlaarfigisimasaata takutippaa Ruslandimeersuunngitsoq, kisianni takoriartigu, Biden oqarpoq.
AAMMA ATUARUK Zelenskyj G20-t siuttuinut: Ukrainemi sorsunneq unitsinneqartariaqarpoq
Rakettip Ukrainemi sakkutuunit igeriunneqarsimaneranik takussutissaqartoq, pisup misissuiffigineqaqqaarnerani takuneqarsinnaasoq, USA-mi atorfilittat nutaarsiassaqartitsivimmut AP-mut oqaatigaat, Ukrainemiut russit rakettiannik nakkartitsiniarsimaneranik takussutissaqarnerarlugu.
Ukrainep silaannartaminik illersuiniarluni rakettit Ruslandimeersut aamma atortarpai.
Kikkut rakettimik igeriussisuunersut misissuinermut peqataanissani, EU-p Polenimut neriorsuutigaa.
Ruslandip Ukraine rakettinik ippassaq saassusseqattaarnerata nalaani rakettit ilaat Polenip kangisissortaanut nakkarpoq.
Nukissiuuteqarnermut atortut Ruslandimit eqqorniarneqartut Ukrainep oqaatigaa.
Ukrainep marlunngornermi saassussinerit, sorsunnerup qaammatit qulingiluangajaat matuma siornatigut aallartinneraniilli aatsaat taama sakkortutigisutut Ukrainemit nalilerneqarput.
