Lavrov: Ukrainemiut oqaloqatigiikkumanngilluinnarlutillu piumasaqaataat piviusorsiunngillat

Ukrainemi sorsunneq, karrinik avammut tunisinnaanissamik isumaqatigiissut nunallu suliffissuaqarfiusut annerit 20-t, tassa G20-t, naalakkersuinikkut siuttuisa inaarutaasumik nalunaarusiaat.

Nunat G20-t Indonesiami qeqertami Balimi ataatsimeersuarneranni qulequtaasa ilaat tamakku, Ruslandip nunanut allanut tunngasunut ministeriata Sergej Lavrovip tusagasssiortunut marlunngornermi sassarnermi ilaatigut isummersorfigai.

AAMMA ATUARUK Zelenskyj G20-t siuttuinut: Ukrainemi sorsunneq unitsinneqartariaqarpoq

Ukrainelu sorsuttoqarneranut atatillugu eqqisseqatigiittoqarsinnaanissaanut isumaqatigiinniarnerni piviusorsiunngitsunik piumasaqaateqartoq, Lavrovip oqaatigaa.

- Ajornartorsiutit tamaasa Ukrainemiunut tunngasuusut uteqqinnikuuara. Taakkumi isumaqatigiinniarusunngilluinnarput piumasaqaataallu erseqqilluinnartumik piviusorsiortuunngillat, Sergej Lavrov nutaarsiassaqartitsivimmut AFP-mut oqarpoq.

AAMMA ATUARUK Karrit pillugit Ukrainemik isumaqatigiissut Ruslandip atorunnnaarsikkaa

Sergej Lavrov, nunat G20-t Balimi ataatsimeersuarnerannut Rusland sinnerlugu peqataavoq. Ruslandimmi præsidentia Vladimir Putin ataatsimeersuarnermi peqataanianngilaq, nammineq oqarneratut allanik ulapputeqarami.

Nunanut allanut tunngasunut ministeri, Sergej Lavrov, Putinip qaninnertut suleqatigisaatut isigineqanngilaq. Tamanna pissutigalugu Ukrainemi eqqisseqatigiittoqarnissaa pillugu pimoorussamik isumaqatigiinniartoqarsinnaanngitsoq, alaatsinaattut isumaqarput.