NATO: Imassanik 75 milliardit koruunit missaannik nalilinnik Ukrainemut nassiussisoqalerpoq
Ruslandip aningaasarsiornini sorsunnerup nalaani aningaasaqarnermut saatsissimavaa, imassanillu amerlasuunik Ukrainemi sorsunnermut atugassanik annertuumik nioqqutissiulersimalluni.
Tamanna nunanut killernut ernumalersitsivoq, Ukrainellu imassanik amigaateqalersinnaanera aamma ernummatigineqarluni. Imassanilli Ukrainemut nassiussisoqalerpoq.
Nunat killiit illersoqatigiiffiata NATO-p qullersaa Jens Stoltenberg taama erseqqissaassuteqarpoq:
- Ukrainep imassanik pilersorneqarsinnaanissaa qulakkeerneqassappat imassanik tunisassiorneq annertusissavarput, imassallu 10 milliardit Euronik nalillit, tassa 75 milliardit koruunit missaannik nalillit tunisassiarineqalissallutik, Stoltenberg oqarpoq.
Nunat NATO-mut ilaasortat imassanik tunisassiornerunissartik taamaasillutik siunniuppaat, imassalli Ukrainemut apuunneqarnissaat sivisusinnaavoq.
Imassanimmi pilersuiniarnermi assartuiniarnermilu ajornartorsiortoqartoq, piffissami kingullermi nalunaarutigineqartarpoq.
