Nato Ukrainemut sivisuumik ikiuinissamut piareersimasoq
Ukrainep Ruslandimit saassunneqarnerani siunissaq ungasinnerusoq eqqarsaatigalugu ikiorneqarnissaa, nunat killiit illersoqatigiiffianni NATO-mi nunat ilaasortat illersornissamut ministeriisa Bruxellesimi ippassaq pingasunngornermi ataatsimiinnerminni uppernarsarpaat.
- Sivisuumik ikiuinissatsinnut piareersimavugut . Ukrainemillu aatsaat taama annertutigisumik tapersersuinissatsinnut piareersimavugut, NATO-p qullersaa Jens Stoltenberg oqarpoq.
AAMMA ATUARUK Nato sakkussianik sakkortuunik Ukrainemut nassiussinissamut kajumissaarisoq
Sakkussiat sorliit Ukrainemut nassiunniarnerlugit nunat NATO-mi ilaasortat namminneq aalajangissavaat. Sakkussiat sakkortuut soorlu qaartartut granatit qaartartullu igeriuttakkat Ukrainemut nassiunniarneqartut ulluni kingullerni oqaatigineqarpoq, Ukrainemiut russit sakkutuuinut taamaasillutik akiuisinnaaniassammata.
Sakkussianik amerlanerusunik nassiussinissaq USA-p præsidentiata, Joe Bidenip, ilaatigut neriorsuutigaa. Sakkussiat 1 milliardit dollarit nalinginut matumuuna nassiunniarneqarput. Qaartartut igeriuttakkat umiarsuarnut sorsuutinut akiuiniarnermut atorneqartartut qaartartullu igeriuttakkat allat imassallu taakkununnga ilaapput.
Tysklandip qaartartut ungasissumut igeriunneqarsinnaasut Ukrainemut aamma nassiunniarpai.
AAMMA ATUARUK NATO-p qullersaata Ukrainemi sorsunneq sivisussangatikkaa
USA-p illersornissaqarfiata qullersaata sakkutuullu naalagaasa qullersaata Mark Milleyip oqarnera naapertorlugu Ukraine sakkussanut tunngatillugu nunaminertami Donbasimi ikinnerussuteqarpoq.
Ukrainep sakkussianik amerlanerusunik tunineqarnissaa taamaammat pingaaruteqartoq, taassuma oqaatigaa.
Russit Donbasimit anisinneqarsinnaanersut piffissap taava takutikkumaarpaa, USA-llu illersornissamut ministeria Lloyd Austin tamanna pillugu aamma siulittuinianngilaq. Ukrainemiulli sakkutuui matumani periarfissagissaarnerusutut nalilerpai.