Nato sakkussianik sakkortuunik Ukrainemut nassiussinissamut kajumissaarisoq
Nunat killiit sakkussianik sakkortuunik Ukrainemut nassiussisariaqarput, russit Ukrainep kangisissuani saassussinerat ukrainemiunit akiorneqarsinnaanissaa taamaasilluni qulakkeerneqassaaq.
Nunat killiit illersoqatigiiffiata NATO-p qullersaa Jens Stoltenberg, nunat NATO-mi ilaasortat akornanni arfineq-marluk, taakkunannga Danmark ilaalluni, Hollandimi Haagimi marlunngornermi unnukkut ataatsimeeqatigereerlugit taama oqarpoq.
AAMMA ATUARUK Zelenskyj-p Danmark qutsavigigaa kaammattorlugulu
NATO-mi iligiit sakkussianik Ukrainemut nassiussisarnitik annertusalereeraat atorfilittallu Bruxellesimi ullumi pingasunngornermi ataatsimiissasut, Stoltenbergip ilanngullugu oqaatigaa.
Ukrainemut ikiorsiinermi suliap ataqatigiissaarnissaa matumani eqqartorneqassaaq, sakkussianik nassiussinissaq taakkununnga ilaalluni.
NATO-p ataatsimoorullu missingersuutaasa nunat akornanni ataqatigiissaarnissaat nunat Bruxellesimi ataatsimeeqataasut arfineq-marluk kissaatigaat. Apeqqutip taassuma NATO-p Madridimi juunip naalernerani ataatsimiinnissaani eqqartorneqartussanut ilaanissaa naatsorsuutigineqarpoq.