Narsarsuarmi meeqqerivik matulerpoq

Narsarsuarmi meeqqerivik Orpinnguaq meerakippallaarmat ukioq manna matulerpoq.

Atuarfik aamma matussasoq pilersaarutaavoq. Kommune Kujallermi politikerit taama novembarip 26-anni ukioq kingulleq aalajangerput.

Niviaaluk Lund Amondsen pingasunik meeraqarpoq. Ataaseq atuartoq, ataaseq meeqqerivimmiittoq ataaserlu aasaq manna meeqqerivimmiilertussaq.

-Meeqqerivimmik matusineq atuarfimmillu matusisoqassagaluarpat taanna uagutsinnut ajortorujuusussaavoq.

Anaanaasoq aamma namminersortutut marlunnik suliffiuteqartoq taama oqarpoq. Taassuma meeqqerivik matuppat atuarfillu matussappat, meeqqani pingasut sulinermini paarisariaqalissavai.

-Ilumoorsinnaasorinngilara Narsarsuarmi ilinniartitsisuujutigalunga, anaanaajutigalunga, meeqqerisuusariaqarnissara.

Kommunalbestyrelsimiit aaliangerneqartoq

Narsarsuarmi meeqqeriviup atuarfiullu matuneqarnissaat Kommune Kujallermi kommunalbestyrelsip siorna novembarip 26-ani ataatsimiinnerminni aaliangerpaat.

Atuarfiup matuneqarnissaa kommunalbestyrelsip aalajangereeraluaraa ammaannassanersoq inerisaanermut ataatsimiitsitaliap aggustimi isummerfigeqqissallugu pilersaarpoq.

Atuarfiup ammaannarnissaanut meeqqat ikippallaalersimapput. 

-Soorunami kissaatiginarpoq nunaqarfittut ingerlaqqissasoq taavalu meeqqat amerlasuut tikissinnaasut. Taava atuartut killissarititaat tikippassuk soorunami ammaannarnissaa kissaatigisupilussuussavarput, Kommune Kujallermi inerisaanermut ataatsimiitsitaliap siulittaasua, Maaliaaraq Nielsen (S) KNR-imut oqarpoq.

Nunaqarfinni atuarfiit pingasut, aqqi saqqummersinneqanngitsut, matuneqarnissaat aamma eqqartorneqarpoq.

Narsarsuaq qimattariaqalersinnaagaat

Kommune Kujallermi inerisaanermut ataatsimiitsitaliami ataatsimiinnerminni meeqqeriviup Orpinnguup matuneqarnissaa apriilimi akuersissutigaat.

Taama aalajangiisoqareeraluartoq, meeqqanik allami suli paaqqinniffissarsisoqanngilaq.

-Angajoqqaatut assut pakatsinarpoq taamatut aaliangiisoqarsimanera taavalu iluamik ersarinnerusumik paasissutissanik tuniorarneqarnata kommuniminngaanniit, Niviaaluk Lund Amondsen oqarpoq.

Meeqqanik ullukkut paaqqisaqartartussarsiorneq suli naammassinngitsoq, Maaliaaraq Nielsenip uppernarsarpaa.

-Paaqqinnittarfimmik qinnuteqartitsineq ingerlasarpoq taassumalu qinnuteqartitsinerup naammassinerani ersersissavaa pissarsisoqarsinnaanera, ataatsimiititaliap siulittaasua oqarpoq.

Meeqqerivik matuppat atuarfillu matoratassappat Niviaaluk Lund Amondsenip Narsarsuarmiiginnarsinnaanissartik nalorninartippaa:

- Narsarsuaq pinngitsaalisamik isaasalerlugu qimattariaqalissagatsigu namminersortuullutalu suliffinnik Narsarsuarmi ingerlatsilluta, nangipporlu.

- Siuarsaaniarlutik eqqartoqattaaginnaavippaat, nunaqarfik siuarsassallugu, kisianni siuarsaanertut isiginngilara ilaqutariit meerartallit nuussinnaaneranik taamatut mattullugit imaluunniit taakani najugallit allamut pinngitsaalillugit isaasalerlugu nuuttariaqalernissaat.