Narsarsuup eqqaani uumasoqarneq savaateqarnerlu sussappat?

Aatsitassarsiorfimmit eqqakkanut sapusiaq aserussappat Greenland Minerals qanoq iliussava?

Narsarsuarmi innuttaasunut tallimanngornermi unnukkut ataatsimiititsinermi apeqqutit ilaat tamakkuupput.

Inuit 40-t missaanniitttut Narsarsuarmi akunnittarfimmi innuttaasunut ataatsimiititsinermut Greenland Mineralsip Namminersorlutik Oqartussallu aaqqissuussaannut ornigupput.

Greenland Minerals, Namminersorlutik Oqartussat ilisimatusarmut sullissivik

Ataatsimiinnermi aqutsisup Nukaaraq Eugeniusip innuttaasunut ataatsiititsineq aallarnerpaat, tamatuma kingorna aatsitassanut naalakkersuisoqarfiup pisortaata, Jørgen Hammeken-Holmip Kuannersuarni aatsitassarsiornissamut suliniuteqarnissamut piffissaq oqaluttuaraa.

Taassuma innuttaasunit oqaaseqaatit ernumanerillu tamarmik allattorneqarlutik politikerinut siorasaarisoqarsimanera pissutigalugu maanna angerlarsimaannartunut tunniunneqarumaartut oqaatigaa.

- Tusarniaanermi ataatsimiititsinermi Naalakkersuisut innuttaasunit oqaaseqaatinut ernumassutinullu tusarnaarnissaat siunertaavoq. Sianiitsumik appequteqanngilaq, politikkulli akissutissaqanngilagut, tassunga piginnaatitaanngilagut, Jørgen Hammeken-Holm ataatsimiinnermi oqarpoq.

AAMMA ATUARUK Urani Naamik Narsarsuarmi nipaatsumik akerliussutsimik takutitsisoq

Naalakkersuisoqarfiup pisortaata saqqummiinerata kingorna Greenland Mineralsimit Johannes Kyed saqqummiivoq.

Taassuma aatsitassarsiutileqatigiiffiup sunik piiaasoqarnissaanut aatsitassallu qanoq atorneqarsinnaaneranut pilersaarutai saqqummiuppai.

- Avatangiisinut tunngasut ukiorpassuarni misissorneqartuarnikuupput. Pinngortitamut annikitsumik kingunerluutaasumik piiaasoqarsinnaavoq, Johannes Kyed oqarpoq.

Nunatsinni Pinngortitaleriffik peqatigalugu Naalakkersuisunut kiffaanngissuseqarlutik siunnersortinit Danmarkimi Nationalt Center for Miljø og Energimit Christian Juncher Jørgensenip suliniutip avatangiisinut kingunerisinnaasai saqqummiuppai.

Innuttaasut apeqquteqarsinnaanerat

Saqqummiussisoqareermat innuttaasut ataatsimiititsisunut apeqqutigerusutaminnik allannissamut minutsinik 15-inik periarfissinneqarput.

Ataatsimiinnermili aqutsisup apeqqutit malittarisassaleqqaarpai. Apeqqutit politikerinit najuuttoqannginnera pissutigalugu politikkimut tunngassanngillat.

Apeqqutit avatangiisinut, inuiaqatigiinnut, peqqissutsimullu tunngatillugu apeqqutaasinnaapput.

Innuttaasut apeqqutissanik pappiaqqamut allattorpaat.

Narsap eqqaani savaatillit sussanersut apeqqutigineqartut ilagaat.

- Naamik, savaatillit qanittumiittut matussanngillat. Narsami nersutaatilik, Sofus Frederiksen oqaloqatiginikuuarput, taassuma aallartissagaluarutta isumaqatigiissuteqarnissaq ammaffigaa, Greenland Mineralsimit, Johannes Kyed oqarpoq.

AAMMA ATUARUK Kuannersuit: Innuttaasunut ataatsimiititsinissat marluk taamaatiinnarneqartut

Apeqqummi allami aatsitassarsiorfimmit eqqakkanut sapusiaq aserussagaluarpat, pinngortitamut eqqagassanik kuugaartoqarluni avatangiisinut ajunaarnersuarmik pilersitsisoqaratarsinnaammat tamanna aatsitassarsioqatigiiffimmit qanoq iliuuseqarfigineqassanersoq apeqqutigineqarpoq.

- Sapusiap aserornissaa ilimananngitsorujussuuvoq, Greenland Mineralsip pisortaa, Jørn Skov Nielsen oqarpoq.

Innuttaasunut ataatsimiititsinermi avatangiisinut peqqissutsimullu tunngasunik apeqquteqartoqaaloreersoq ataatsimiinneq nalunaaqutaq 21.40 naammassineqarpoq.

Ataatsimiititsinermi politikerit peqataannginnerat pissutigalugu ataatsimiinneq innuttaasunut ataatsimiititsinertut isiginagu innuttaasup naggataarutitut oqaaseqarfigaa.

Qaqortumi ataasinngorpat innuttaasunik ataatsimiititsisoqassaaq. Qassiarsummi Igalikumilu innuttaasunik ataatsimiititsinissat anorersuarnissaa pissutigalugu taamaatinneqartut Naalakkersuisut nalunaarutigaat.