Kuannersuit: Innuttaasunut ataatsimiititsinissat marluk taamaatiinnarneqartut
Kuannersuarni aatsitassarsiornissaq pillugu innuttaasunut ataatsimiititsineq siulleq unnummut Narsarsuarmi ingerlanneqarpoq.
Ataatsimiinnerli suli aallartinngitsoq nunatsinni innuttaasunut ataatsimiititsinissat oqallisigineqarnerpaagallartut pillugit ajornartorsiut alla takkuppoq.
Ataatsimiititsinissaniimmi katillugit arfineq-marlunnit marluk maanna taamaatiinnarneqarput. Qassiarsummi aqagu Igalikumilu sapaatiuppat ataatsimiititsinissat taamaatiinnarneqartut, aatsitassaqarnermut naalakkersuisoqarfik paasissutissiivoq.
Kuannersuarni aatsitassarsiorfik pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Minerals aatsitassarsiornissamut akuerineqassanersoq - qaqugu tamanna pissanersoq ilisimaneqanngilaq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut ) 111 millionit tonsiussalluni.
Tusarfik: Pinngortitaleriffik aamma Nationalt Center for Miljø og Energi, IPN-iliaq.
Naalakkersuisoqarfik naapertorlugu tamanna anorersuarnissaanik pissuteqarpoq.
Innuttaasunut ataatsimiititsisussat nunaqarfinni marlunni sila pissutigalugu aallarneq ajulernissartik ernumassutigaat - aallarnermi ajulissagunik ataatsimiititsinissat sinnerinut sisamanut Qaqortumi Narsamilu ataasinngornermi marlunngornermilu ingerlanneqartussanut ornigussinnaajunnaassagamik.
Qaartartumik siorasaarinerit taamaatitsinerillu
Innuttaasunut ataatsimiititsinermi peqataasussat tassaapput Namminersorlutik Oqartussanit atorfillit suliffeqarfillu Kuannersuarni aatsitassarsiorniartoq Greenland Minerals.
Aatsitassanut naalakkersuisoq, Jens Frederik Nielsen (D) aamma peqataasussaagaluarpoq. Taassumali peqataanissani qaartartumeerinissamik siorasaarisoqarnerata kingunerisaanik tamaatillugu sapaatip-akunnerata ataatsip matuma siorna nalunaarutigaa.
Innuttaasunut ataatsimiititsisoqarnerani isumannaatsoqarnissaa Kalaallit Nunaanni Politiit oqaatigigaluarpaat, aamma inuit peqataanngiinnartariaqarneranik pissutissaqannginnerarlugu.
Innuttaasunut ataatsimiititsinerit nunatsinni partiimi annerpaami Siumumi aamma avissaartuussutaapput.
AAMMA ATUARUK Siumut ataatsimiititsinissanik suli kinguartitseqqusivoq
Kuannersuit pillugit suliniut ukiuni 14-ini sulissutigineqarpoq - Siumulli siulittaasortaavata siulittaasuata tullersortaata innuttaasunut ataatsimiititsinissat piffissami killiligaanngitsumi taamaatiinnarneqarnissaat siulersuisunit nutaanit kissaatigineqartoq sapaatip akunnerata siuliani nalunaarutigaat.
Aatsitassarsiornissamik suliniummut taama akerliliisoqartiginera tusaanngitsuusaaginnarneqarsinnaanngitsoq Siumup qullersaat isumaqarput - taamaammallu ataatsimiititsinissat maanna unitsinneqartariaqarlutik.
- Ataasinngorneq februaarip ulluisa arfineq pingajuanni Qaqortumiit nalunaaqutaq 14.00-imit 16.30-mut aamma 19.00-imit 21.30-mut aallakaatitsisoqassaaq
- Marlunngorneq februaarip qulingiluaani Narsamit nalunaaqutaq 14.00-imit 16.30-mut aamma 19.00-imit 21.30-mut aallakaatitsisoqassaaq
Partiip aatsitassarsiortoqarnissaata allartinnissaa ukiorpassuarni sulissutigigaluarpaa.
AAMMA ATUARUK Urani Naamik Narsarsuarmi nipaatsumik akerliussutsimik takutitsisoq
Tamannali pissutigalugu innuttaasunut ataatsimiititsinerit siulliup unnummut maanna Narsarsuarmi ingerlanneqarnissaanut uniffiunngilaq.
Tusarniaanermut piffissaliussaq sivitsorneqarpoq. Tamanna pissutigalugu innuttaasut suliniummut isumammaminnik juunip ulluisa aallaqqaataata tungaanut apuussaqarsinnaapput. Siullermik tamanna marsip qiteqqunnissaanut killeqaraluarpoq.
Naalakkersuisullu piffissami aggersumi ataatsimiititsinernut allanut nutaanik piffissaliisoqarnissaanut aamma aalajangiipput, tassani politikerit aamma peqataassapput.
