Urani Naamik Narsarsuarmi nipaatsumik akerliussutsimik takutitsisoq
Namminersorlutik Oqartussanit Greenland Mineralsimiillu Narsarsuarmi innuttaasunik ataatsimiititsiartortut ullumi tikimmata peqatigiiffimmit, Urani Naamimit aaqqissuuneqartumik akerliussutsimik takutitsiffigineqarput.
Akerliussutsimik takutitsinermi inuit 30-t peqataapput, taakkua aaqanngitsumik Uraani Naamik ilisarnaataanik ilisarnaasikkamik atorput.
Akerliussutsimik takutitsisut allagartalisaarput, ilaatigut ima allannertalinnik: "Nunami aserortigassinni tikilluaqqusaanngilluinnarpusi. Timmisartup uternerani uterniaritsi!".
Kuannersuarni aatsitassarsiorfik pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut ) 111 millionit tonsiussalluni.
Tusarfik: Pinngortitaleriffik aamma Nationalt Center for Miljø og Energi, IPN-iliaq.
Akerliusut ilaat taama oqariartuuteqarpoq aamma alla ima allassimasumik nassarpoq:
"Naak oqartussaaqataanerput? Greenland Mineralsip nunarput aqussanngilaa"
Inneruulalimmi savaatilik Piitaq Lund nipaatsumik akerliussutsimik takutitsinermi peqatavoq. Taassuma Greenland Mineralsip Narsap eqqaani Kuannersuarni aatsitassarsiortoqarnissaa akerleraa.
- Akerliussutsimik takutitsinerput neriuppunga iluaqutaassasoq, tusaanngitsuusaaginnartoqarsinnaanngilarmi inuiaqatigiinnut. Kujataani innuttaasut amerlanerpaartaat taamak akerliutillugit soqutiginngitsuusaaginnartoqarsinnaannginnami, Piitaq Lund oqarpoq.
Politiit akerliussutsimik takutitsinnermi aamma najuupput. Taakkuli suliaqarujussuanngillat.
Kuannersuarni aatsitassarsiortoqarnissaa akerleriiffiusoq pillugu innuttaasunut ataatsimiititsinissanit katillugit arfineq marluusunit siulleq Narsarsuarmi ingerlanneqassaaq.
Innuttaasunut ataatsimiititsineq unnugu nalunaaqutaq 19.00 aallartissaaq.
KNR-ip innuttaasunut ataatsimiititsinerit Qaqortumi Narsamilu februaarip ulluisa arfineq-pingajuanni qulingiluaannilu malinnaaffigissavai. Ataatsimiititsinerit KNR-TV-kkut toqqaannartumik malinnaaffigisinnaavatit.
Innuttaasunut ataatsimiititsinissamut piffissat sumiiffissallu uani ataani takusinnaavatit:
