Narsami inuusuttut titartaanermik pikkorissartinneqalersut
Narsami inuusuttut 15-it 35-llu akornanni ukiullit suliniummut "TITARTAASA"-mut peqataanissamut periarfissinneqassapput.
Eqqumiitsuliortup assitalersuinermik ilusilersuisartutut ilinniarsimasup Konrad Nuka Godtfredsenip suliniummi aqutsisoq Heidi Zilmer illunik qalipaasartutut ilinniarsimasoq pikkorissaaqatigissavaa.
- Majoriap siunertaa malillugu inuusuttut kaammatorlugit aqqummik nutaamik tunniusserusuppugut, neriulluta inuusuttut peqataanerminni majoriaqqinnissaminnut sakkussamminnik pissarsilluarumaartut, TITARTAASA-mi pikkorissaaqataasussaq Narsami inunngorsimasoq Konrad Nuka Godtfredsen tusagassiutinut taama ilaatigut allaaserisaqarpoq.
AAMMA ATUARUK Inuusuttut marluk Great Greenlandip iigaanik kusassaasussatut toqqarneqartut
Heidi Zilmer, eqqumiitsuliortoq Bolatta Silis-Høegh pikkorissaaqatigalugu 2018-ip ingerlanerani suliniummut assingusumik Qaqortumi ingerlatsereernikuuvoq, suliniullu Narsamut maanna ingerlateqqinneqarluni:
- Qularinngilara illoqarfitsinnut qiimmaallatsitsissasoq qalipaatigissunik eqqumiitsulianik illut isuini isigisassaqalerumaarneq, aammalu minnerunngitsumik piareersaataasumik inuusuttatsinnut eqqumiitsuliornermillu soqutigisalinnut sammisassatsialaassasoq suliap ingerlatsilinnginnerani piareersaataasumik ilitsersuinissami. Isumassarsiaq torraaqaaq, Karla Egede Bisgaard, Majoriaq Narsami pisortaasoq oqarpoq.
