Inuusuttut marluk Great Greenlandip iigaanik kusassaasussatut toqqarneqartut
Inuusuttut 65-it assilialiortitsinermut ukioq manna apriilimi peqataapput. Qalipakkanik unammisitsineruvoq, unammisitsinerlu juulip qiteqqunnerata nalaani naammassineqarluni.
Inuusuttut qulingiluat Great Greenlandip iigaanik kusassaatissanik siunnersuuteqarput, taakkunanngalu marluk kusassaasussatut toqqarneqarlutik.
Kaaka Kielsen Olsenip qalipagaa "Arnaq" toqqarneqarpoq. Qalipagaq arnaavoq nalitsinneersoq, oqaluttuatoqqanilli soorlu sassuma arnaanit pisuusinnaalluni. Heidi Zilmer, eqqumiitsuliortoq suliniummillu aqutsisoq, tusagassiutinut nalunaarummi taama ilaatigut allaaserisaqarpoq.
Naja Theresiap qalipagaa "Qipoqqaq" kalaallisuunit isumassarsiaasunik titartarnertaqarpoq:
- Inerneri pitsaangaarmata ajugaasumik toqqaanissaq assut ajornakusoorpoq. Tassuuna takusinnaavarput Qaqortumi eqqumiitsuliornermut piginnaaneqartoqarmat inerisagassaqqissunik sulissutigisariaqartunillu, eqqumiitsuliortoq, suliaqartitsinermilu aqutsisoq oqarpoq.
Qalipakkat marluk taakku Great Greenlandip iigaanik kusassaanerussapput, qalipakkallu aggustip ulluisa 18-ianni uleerneqassallutik.