Ukiamut aalajangerneqassaaq Narsami angerlarsimaffiit qanoq pineqassanersut, borgmesteri Stine Egede oqarpoq.Assi: Inuit Ataqatigiit

Narsami borgmesteri: radon eqqumaffiginerussavarput

Ukiamut aalajangerneqassaaq Narsami angerlarsimaffiit qanoq pineqassanersut, borgmesteri Stine Egede IA oqarpoq.

Kommune kujalleq suli aalajanginngilaq Narsami radoneqassuseq qanoq periarneqassanersoq.

Ukiummi 20-t matuma siornatigut misissuisoqarneranit paasineqarpoq Narsami angerlarsimaffiit iluini radoneqassasuseq annertoorujussuusoq.

Sapaatip akunnerata siuliani ilanngutassiaraarput Århusip Universitetiani ilisimatooqatigiit tamanna pillugu sukumiisumik misissuillutik aallartissimasut, oqaluttuaraarpullu gassi kræfteqalersitsisartoq radon angerlarsimaffippassuarnut isaasoq taamalu inunnut najugaqartunut ulorianaateqartoq.

AAMMA ATUARUK Narsami radonneqarnerujussua: Illoqarfipput asavarput qimaannarsinnaanagulu

Kommune Kujallerni borgmesteri Stine Egede Inuit Ataqatigiit, isumaqarpoq, siunissami Narsami illulioriaatsip allannguuteqarfigineqarnissaa allaqqunneqarsinnaanavianngitsoq.

- Misissuinerit nutaat takkuteriarpata qanoq iliuuseqarsinnaanerput naliliiffigiumaarparput, Stine Egede oqarpoq, nangipporlu:

- Pingaartumik Narsaq radonimik peqarfiusoq qangali ilisimavarput taassuma siunissami eqqumaffigineqarluarnissaa allaqqunneqarsinnaanngilaq, oqarpoq.

Silaannarissartuarneq

Ukiummi 20-t matuma siorna misissuinerup takutippaa, Narsami illup iluini radoneqassuseq kubikmeterimut 139 becquerelimik annertussuseqartoq.

Taamaalillunilu WHO-p killigeqqusaa kubikmeterimut 100 becquerel Narsami qaangerneqarujussuarsimavoq.

Kommune kujallermi borgmesteri kajumissaarivoq Narsami illup iluisa silaannarissarluarneqartarnissaat eqqumaffigineqartassasoq.

- Tamatta illuuteqartuusugut illutta silaannarissartarnissaa eqqumaffigisarparput neriuppungalu amerlasuut namminneerlutik tamatuminnga iliuuseqareersimassasut, taanna oqarpoq.

Angerlarsimaffiup iluani qanoq radoneqartiginersoq imaaliinnarlugu ilisimaneqarsinnaanngilaq taannami gassi ersinngilaq malugineqarsinnaananilu.

- Radon takusinnaanngilarput kisianni paasitinneqarsimavugut radonimik peqarluartoq taamaattumik illuutillit innersuutiinnassavakka silaannarissarluartaqqullugit, Stine Egede oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl