Naqisimaneqanngitsunik tusagassiisinnaaneq pingaaruteqarluinnarpoq
Naalakkersuisuusimasup Palle Christiansenip tamanna pissutigerpiarlugu Naalakkersuisut siulittaasuannut § 37 naapertorlugu apeqquteqaateqarpoq, Naalakkersuisut siulittaasua ersarissumik paatsoorneqarsinnaanngitsumillu Olsenip naqisimaneqanngitsumik tusagassiisarnermut sioorasaarineranut akerliliiniarnersoq paaserusuppaa.
Politikerit nunatsinni tusagassiuutinik aatsaat sunniinialinngillat. Naalakkersuisut ilassinninnermut aningaasanik atuivallaarnerat AG-p 1990-imi isornartorsiorlugu allaaserimmagu, taamani Naalakkersuisunut siulittaasuusup nuna tamakkerlugu aviisinut saqqummersartunut nassiussinermut tapiissut peerniarlugu sioorasaarutigaa.
-Isumaqarlunga qaangiutereersoq, politikerit qunusaarisarnerat imaluunniit kiffaanngissuseqarlutik tusagassiortunut nipangersitsiniartarnerat. Kisianni taamaassimagunanngilaq. Sermitsiami qanittukkut atuarparput partiip nutaap aallarteqqammersup siulittaasuata, Naalakkersuisoqatigiinni suleqataasup, KNR siorasaarsimagaa ukiumoortumik ingerlatsinermut tapiissutisiaanik arsaarniarlugu, iluarinnginnamiuk majip ulluisa allaqqaataani oqalugiaammi tigulaariffigineqarsimanera aamma naammaginnginnamiuk nammineq isummani naapertorlugu partiimi sinniisuisalu illuinnaasiortumik isornartorsiorneqartuarnerat, Palle Christiansen aalajangersumik oqarpoq.
Ukiorpassuanngortuni ileqquuvoq Inatsisartut KNR-ip ingerlanneranut sinaakkusiisarnerat. Inatsisit, publicservice pillugu isumaqatigiissutit tapiissutillu aqqutigalugit. Kisianni politikerit KNR-ip nutaarsiassalerineranut sunnguamilluunniit akuliuttussanngilaq.
KNR kiffaanngissuseqarluni tusagassiortuuvoq, namminerlu aalajangertarlugu qanoq pissaanermik tigummisut isornartorsiortassanerlugit. Tusagassiorfiimmi tamanna suliassaraat nunani demokrati tunngavigalugu ingerlasuni.Taamaattumik uannut pingaaruteqarpoq – aamma inuiaqatigiinnut tamanut – paasissallugu Naalakkersuisunngorlaat akuliuttussaatitaannginneq kipitinniarneraat uterfigalugulu qangatut tusagassiorfinnik aqutsiniarsarisarneq, Palle Christiansen oqarpoq.
