Napparsimasut ingiaqateqartikkusukkai

Ilaqutaasut Københavnimi kalaallit peqqissartut ineqarfianni najugaqassagaangamik ullumikkut namminneq akiliisarput, Mimi Karlsenilli tassa massakkut siunnersuutigaa aningaasartuutit pisortanit akilerneqartalissasut.

- Inuunermi navianartorsiutaasinnaasumik napparsimasoqartillugu soorlu kræfteqalertoqartillugu Danmarkimi napparsimmavissuarmi katsorsartikkiartoraanni, taava peqqissartut angerlarsimaffianni najugaqarluni kisimiinnartorujussuusarami, inuunermilu pisariaqarnerpaaffiani ilaquttanik qanimut ilagineqarnissami kisimiinneq artornartuusarluni, Inuit Ataqatigiit sinnerlugit Inatsisartuni ilaasortaq Mimi Karlsen taama oqarpoq.

Ilaqutariit napparsimasoqartillugu eqqorneqareertarnerat taassuma ilanngullugu oqaatigaa.

Pinartumik napparsimalersimasoq Danmarkiliartariaqaleraangat ilaquttamik ataatsimik ullumikkut angalaqateqarsinnaasarpoq, napparsimasorlu katsorsarneqarsinnaanngoraangat ilaqutaasoq ineqarnermut assigisaanullu Namminersorlutik Oqartussanit akiliunneqarsinnaajunnaartarpoq, taamaaligaangallu ilaqutaasut aamma eqqorneqartarput.

Mimi Karlsenip siunnersuutaa Inatsisartut upernaaq ataatsimiinneranni siullermeerneqarpoq.

Iluaqutissai aningaasartuutillu

Naalakkersuisut siunnersuutip aappassaaneerneqarnissaanut atatillugu ima ilaatigut akissuteqarput.

"Naalakkersuisut misigisimapput erseqqissaassutigissallugu tulleriiaarinerup iluani aningaasat killeqarmata. Naalakkersuisut isumaqarput Peqqinnissaqarfimmi aningaasat pigisavut tulleriiaartariaqarivut napparsimasunik passussinermut kiisalu tamatuma kingunerisaanik peqqinnissaqarfiup pingaarnertut suliassaqarfiani pitsaassutsimik pitsanngorsaanissamik qitiutitsilluta.

Naalakkersuisut isumaqarput siunnersuutip kingunerisaanik aningaasaqarnermut tunngatillugu naatsorsuutigisat patajavallaartut."

Taamaattoq Mimi Karlsenip oqaatigaa pingaaruteqartoq napparsimasup ilaquttaminik ingiallorneqarnermini iluaqutissartaqartoq:

- Nalunngilluinnaraluarpara Nunatsinni aningaasameertoqartoq, kisianni isumaqarpunga napparsimasut ajorunnaartinniakkavut pitsaasumik atugaqartissagutsigit taava aamma periarfissittariaqarpavut ajorunnaarniarnerminni ilaquttaminnik ilaqarsinnaanissaat, taamaasillugu ajorunnaarsinnaanissaat angusinnaajumallugu, Inuit Ataqatigiit sinnerlugit Inatsisartuni ilaasortaq Mimi Karlsen taama oqarpoq.

Pinartumik napparsimasoqartillugu ilaqutaasut napparsimasumut ingiallortitut ilaasinnaanissaannut siunnersuut piviusunngortinneqarpat tamanna 1,7 millionit koruuninik aningaasartuutaassasoq.

Ilaqutaasut angalaqataasut timmisartornermut aningaasartuutit namminneq suli akilertartussaavaat. Siunnersuut inatsisartut pilersaarutit naapertorlugit novembarip ulluisa aqqarnanni aappassaaniissavaat.